Dushyant Chautala : भाजपचा आणखी एक जुना मित्रपक्ष फुटीच्या उंबरठ्यावर; अनेक नेत्यांनी सोडली साथ

Chandigarh : मागील काही वर्षांत भाजपची साथ अनेक मित्रपक्षांनी सोडली आहे. त्यातील काही पक्ष फुटले तर काही कमकुवत झाले. आणखी एक जुना मित्रपक्ष फुटीच्या उंबरठ्यावर आहे. हरियाणातील दुष्यंत चौटाला यांचा जननायक जनता पक्षातील अनेक नेत्यांनी त्यांची साथ सोडली असून काही सोडचिठ्ठी देण्याच्या तयारीत आहेत.

दुष्यंत चौटाला यांच्या पक्षाने हरियाणातील 2019 च्या विधानसभा निवडणुकीत चमकदार कामगिरी केली होती. त्यानंतर राज्यात भाजपसोबत चौटाला यांनी सत्तास्थापन केली. पण काही महिन्यांपूर्वीच त्यांनी सरकारमधून बाहेर पडत भाजपची साथ सोडली. त्यानंतर आतापर्यंत पाच आमदार पक्षातून बाहेर पडले आहेत.

बिहारमधील चिराग पासवान यांच्या लोक जनशक्ती पक्षाचीही काही महिन्यांपूर्वीच अशीच स्थिती झाली होती. त्यांच्याही पक्षात फूट पडल्यानंतर चिराग यांच्या विरोधात गेलेले काका पशुपती पारस यांना केंद्रीय मंत्रिमंडळात स्थान देण्यात आले होते.

हरियाणात विधानसभा निवडणुकीची नुकतीच घोषणा करण्यात आली आहे. त्याआधीच चौटाला यांचे पाच आमदार पक्षातून गेले आहेत. यासह इतर काही नेत्यांनीही बाहेर रस्ता धरला आहे. 2019 मध्ये पक्षाने दहा जागा जिंकत किंगमेकरची भूमिका पार पाडली होती. त्यामुळे चौटाला उपमुख्यमंत्री बनले. पण लोकसभा निवडणुकीत पक्षाच्या सर्व उमेदवारांचे डिपॉझिट जप्त झाले.

पक्षाची लोकप्रियता कमी होत असल्याने नेते पक्ष सोडत असल्याचे सांगितले जात आहे. चौटाला यांनी आमदारांना पक्षात सर्वाधिक सन्मान दिल्याचे सांगत नाराजी व्यक्त केली आहे. इतर पक्षांत त्यांना एवढा मान मिळणार नाही, असा टोलाही त्यांनी लगावला आहे.

दरम्यान, विधानसभा निवडणुकीत चौटाला आम आदमी पक्षासोबत आघाडी करणार असल्याची जोरदार चर्चा सुरू आहे. लोकसभा निवडणुकीत आपला राज्यात चांगली कामगिरी करता आली नाही. राज्यातही पक्षाला एकही जागा मिळाली नाही. इंडिया आघाडीमध्ये असूनही त्यांनी पंजाबसह हरियाणातही वेगळी चूल मांडली होती. आता विधानसभेतही चौटाला यांच्यासोबत जात आपकडून काँग्रेस व भाजपला टक्कर दिली जाईल, असे सांगितले जात आहे.