PM Narendra Modi : बांगलादेशातील हिंदूंवरील अत्याचारावर पहिल्यांदाच पंतप्रधानांनी केलं भाष्य; म्हणाले...

बांगलादेशातील हिंसाचार आणि तेथील हिंदूंवर झालेल्या अत्याचाराबद्दल पंतप्रधान नरेंद्र मोदी यांनी लाल किल्ल्यावरून भाष्य केलं आहे. बांगलादेशीतल हिंदू आणि अल्पसंख्याकांची काळजी घेतली पाहिजे, असं पंतप्रधान मोदी यांनी म्हटलं आहे. तेथील परिस्थिती लवकर सामान्य व्हावी, अशी आशा पंतप्रधान मोदी यांनी व्यक्त केली.

पंतप्रधान मोदी ( Narendra Modi ) म्हणाले, "बांगलादेशात जे काही घडले, त्याबद्दल एक शेजारील देश या नेत्यानं काळजी वाटणं साहजिक आहे. तेथील परिस्थिती लवकरच सामान्य होईल, अशी मला आशा आहे. बांगलादेशातील हिंदू समाजाची सुरक्षेबाबत काळजी घ्यावी, अशी देशवासीयांची इच्छा आहे. अंतरिम सरकार हिंदू समाजाच्या सुरक्षेबाबत योग्य ती काळजी घेईल."

"आपल्या शेजारील देशांनी सुख आणि शांतीचा मार्ग अवलंबावा, अशी भारताची नेहमीच इच्छा असते. आगामी काळात बांगलादेशमधील विकासासाठी आमच्या शुभेच्छा आहेत," असं पंतप्रधान मोदी यांनी म्हटलं.

नेमकं काय घडलं?

आरक्षणाच्या मुद्द्यावरून बांगलादेशमध्ये अराजकता पसरली होती. यानंतर बांगलादेशमध्ये सर्वत्र जाळपोळ आणि तोडफोड करण्यात आली. शेख हसीना यांना पंतप्रधानपदाचा राजीनामा देऊन भारतात आश्रय घ्यावा लागला. शेख हसीना यांनी राजीनामा दिल्यानंतर हिंदू, त्यांची घरे आणि त्यांच्या प्रार्थनास्थळांवर हिंसक हल्ले झाले. त्यात अनेकांचा मृत्यू झाला.