IndiGo Flight Mayday Call - आता ‘इंडिगो’च्या विमानातूनही आला धडकी भरवणारा ‘Mayday’ कॉल!

IndiGo Flight Issues 'Fuel Mayday' in Route to Chennai- अहमदाबाद एअर इंडिया विमान दुर्घटनेनंतर  मेडे कॉलची खूप चर्चा झाली होती. विमानाला धोका असताना आणि परिस्थिती नियंत्रणाबाहेर गेल्यावर पायलटकडून हा कॉल केला जातो. अहमदाबाद विमान अपघाताला दहा दिवसही उलटलेले नाहीत आणि आता इंडिगोच्या विमानातूनही पायलटने सर्वांनाच धडकी भरवणारा ‘फ्युएल मेडे कॉल’ केल्याचे समोर आले आहे.

 प्राप्त माहितीनुसार, गुरुवारी, गुवाहाटीहून चेन्नईला जाणारी इंडिगोची फ्लाइट 6E 6764, पुरेशा इंधनाअभावी 'फ्युएल मेडे' कॉल दिल्यानंतर ती बंगळुरूला वळवावी लागली. चेन्नई विमानतळावर गर्दीमुळे विमान वेळेवर तेथे उतरू शकले नाही. आपत्कालीन मार्ग बदलादरम्यान विमानात प्रवासी होते. अशा परिस्थितीत, रात्री सव्वा आठ वाजता विमान बंगळुरूमध्ये सुरक्षितपणे उतरवण्यात आले. म्हणजेच, चेन्नईला जाणारे विमान बंगळुरूमध्ये उतरवावे लागले.

फ्युएल मेडे कॉल म्हणजे काय? -

जेव्हा विमानात इंधनाची कमतरता असते आणि विमान धोक्यात असते, तेव्हा विमानाच्या पायलटकडून इंधन मेडे कॉल केला जातो. हा कॉल आंतरराष्ट्रीय विमान वाहतूक संप्रेषण प्रोटोकॉलचा भाग आहे. याचा अर्थ परिस्थिती गंभीर आहे आणि त्वरित काहीतरी करावे लागेल. जेव्हा विमानाचे इंधन किमान इंधन पातळीपेक्षा कमी होते आणि पायलटला असे वाटते की लँडिंगला उशीर होऊ शकतो किंवा विमान अपघाताचा बळी पडू शकते, तेव्हा पायलट हा कॉल वापरतो.

आंतरराष्ट्रीय नियमांनुसार, जर विमानातून मेडे कॉल आला असेल तर त्याला सर्वोच्च प्राधान्य द्यावे लागेल आणि त्याच्या लँडिंगची व्यवस्था करावी लागेल. जर पायलटने मेडे कॉल केला असेल तर याचा अर्थ असा आहे की विमानाला ताबडतोब उतरण्याची परवानगी द्यावी लागेल. यामुळे अपघाताचा धोका कमी होतो. फ्युएल मेडे कॉलचा उद्देश असा आहे की विमान धोक्यात आहे आणि विमान आणि विमानात बसलेल्या लोकांना कोणत्याही प्रकारे संरक्षित करावे लागेल. अहमदाबाद विमान अपघातादरम्यानही पायलटने अनेक वेळा मेडे कॉल केला होता.

(Edited by - Mayur Ratnaparkhe)