Israel Iran War : मोठी बातमी! पहिल्यांदाच अमेरिका-इस्रायलमध्येच मतभेद; इराणच्या 'त्या' भागात हल्ले न करण्याचे डोनाल्ड ट्रम्प यांचे आदेश

Israel Iran War : अमेरिका-इस्रायल आणि इराण यांच्यात मागील बारा दिवसांपासून युद्ध सुरू आहे. दिवसेंदिवस हे युद्ध आणखी तीव्र होताना दिसत आहे. शिवाय या युद्धाचे परिणाम संपूर्ण जगावर होत आहेत. गॅससह पेट्रोल आणि डिझेलची टंचाई अनेक देशांत निर्माण झाली आहे. त्यामुळे हे युद्ध नेमकं कधी संपणार? याकडे संपूर्ण जगाचं लक्ष लागून राहिलं आहे.

मात्र, इराण काही केल्या माघार घेण्यास तयार नसल्याचं दिसत आहे. तर अमेरिका आणि इस्रायलही इराणवर तीव्र हल्ले करत आहेत. मात्र, पहिल्यांदाच अमेरिकेने इस्रायलने केलेल्या काही हल्ल्यावर नाराजी वर्तवली आहे. शिवाय इथून पुढे इराणच्या तेल आणि ऊर्जा अशा पायाभूत सुविधांवर हल्ले करू नयेत अशा सूचना दिल्या आहेत.

दरम्यान, अमेरिकन माध्यम संस्था Axios च्या माहितीनुसार, इस्रायलने इराणच्या ऊर्जा क्षेत्रावर केलेल्या हल्ल्यांमुळे तेहरानमध्ये काळ्या विषारी धुराचे ढग पसरले आहेत. त्यामुळे मोठ्या प्रमाणात तसेच काही भागांमध्ये अॅसिड रेनच्या घटनाही समोर आल्या आहेत.

या परिस्थितीमुळे सामान्य इराणी नागरिकांच्या आरोग्यावर गंभीर परिणाम होण्याची भीती व्यक्त केली जात आहे. त्यामुळेच ट्रम्प प्रशासनाने इस्रायलला इराणच्या तेल साठ्यांवर आणि ऊर्जा सुविधांवर पुढील हल्ले टाळण्याचे आवाहन केले आहेत.

तसंच दुसरीकडे इराणच्या पायाभूत सुविधांवर सतत होणारे हल्ले हल्ले इराणच्या सामान्य जनतेसाठी मोठ्या अडचणी निर्माण करू शकतात आणि डोनाल्ड ट्रम्प यांचं उद्दीष्ट इराणी जनतेला त्यांच्या शासनाविरोधात उभं करायचं आहे. मात्र त्यासाठी त्यांच्या मूलभूत सुविधांचे नुकसान होऊ नये, अन्यथा ते लोकं शासनासोबत उभे राहतील ही भीती ट्रम्प यांना आहे.

तसंच हे हल्ले थांबवायला सांगण्यामागे प्रमुख तीन कारणं आहेत. त्यामध्ये, पहिलं इराणमधील जनतेचे समर्थन मिळवणे आणि त्यांना सध्याच्या शासनाविरोधात उभं करणं दुसरं भविष्यात इराणच्या तेल क्षेत्रासोबत आर्थिक आणि व्यापारी सहकार्य करण्याची अमेरिकेची योजना आहे.

आणि तिसरं आणि सर्वात महत्त्वाचे कारण म्हणजे इराणकडून आखाती ऊर्जा तळांवर प्रतिहल्ले होऊ शकतात. ज्यामुळे जागतिक तेल बाजारावर मोठा परिणाम होऊ शकतो. त्यामुळे ट्रम्प यांनी सध्या इस्राईलला इराणच्या तेल आणि ऊर्जा अशा पायाभूत सुविधांवर हल्ले करू नयेत अशा सूचना दिल्या आहेत.