Loksabha Election News : BSP चा उमेदवार पती धर्मसंकटात; पत्नी काँग्रेसची आमदार असल्यानं सोडलं घर

Madhya Pradesh News : निवडणूक म्हटली की राजकीय पक्षांमध्ये आरोप-प्रत्यारोप होतच असतात. पण ही स्थिती केवळ पक्षांपुरतीच मर्यादीत नसते. एकाच कुटुंबामध्ये विविध राजकीय पक्षांच्या विचारधारेचे सदस्य असतात. त्यातून मग घरा-घरांत वाद झाल्याचे, कुटुंब फुटल्याचे महाराष्ट्रासह अनेक ठिकाणी पाहायला मिळाले आहे. यंदाची निवडणूकही त्याला अपवाद ठरली नाही.

पत्नी काँग्रेसची (Congress) आमदार तर पतीला बहुजन समाज पक्षाची उमेदवारी मिळाल्याने त्यांनी थेट घर सोडण्याचा निर्णय घेतला. आता मतदानानंतरच ते घरी परतणार आहेत. त्यांचे नाव आहे कंकर मुंजारे (Kankar Munjare). मध्य प्रदेशातील बालाघाट लोकसभा मतदारसंघातून त्यांना बीएसपीने (BSP) उमेदवारी दिली आहे.

मुंजारे यांच्या पत्नी अनुभा मुंजारे (Anubha Munjare) या काँग्रेसच्या आमदार आहेत. दोघांच्या विचारधारा वेगळ्या असल्याने एकाच छताखाली राहू शकत नाही, असे म्हणत कंकर मुंजारे यांनी घर सोडले आहे. पहिल्या टप्प्यातील मतदान 19 एप्रिलला आहे. या मतदानानंतर घरी परतणार असल्याने माजी आमदार असलेल्या मुंजारे यांनी सांगितले.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

पीटीआयशी बोलताना मुंजारे म्हणाले, मी शुक्रवारी घर सोडले असून मतदारसंघातील धरणाजवळ झोपडीत राहत आहे. एकाच विचारधारेच्या दोन व्यक्ती एकाच छताखाली राहिल्या तर लोकांना ही मॅच फिक्सिंग वाटेल, असे मुंजारे यांनी सांगितले.

अनुभा मुंजारे यांनी मागील वर्षी झालेल्या विधानसभेच्या निवडणुकीत भाजपचे नेते गौरीशंकर बिसेन यांचा पराभव केला होता. पतीच्या या निर्णयावर बोलताना त्यांनी नाराजी व्यक्त केली. त्या म्हणाल्या, ते गोंडवाना गणतंत्र पक्षाचे उमेदवार असताना मी काँग्रेसच्या तिकीटावर बालाघाटमध्ये विधानसभेची निवडणूक लढत होते. त्यावेळी आम्ही एकाच घरात राहत होतो. आमच्या लग्नाला 33 वर्षे झाली. एका मुलासोबत आनंदात राहत आहोत.

आपण काँग्रेसच्या विचारधारेशी सोडले असल्याचे सांगताना अनुत्रा मुंजारे यांनी पक्षाच्या उमेदवारासाठीच काम करणार असल्याचे स्पष्ट केले. बालाघाटमध्ये काँग्रेसने सम्राट सारस्वत यांना उमेदवारी दिली आहे. पक्षाशी मी प्रामाणिक असून सारस्वत यांच्या विजयासाठीच काम करणार असल्याचे त्यांनी म्हटले आहे. मात्र, प्रचारादरम्यान पतीविषयी काही बोलणार नसल्याचेही त्यांनी सांगितले.