मोठी बातमी : मुलींच्या लग्नाचे वय वाढणार... मंत्रिमंडळाने दिली मंजूरी

नवी दिल्ली : मुलींच्या विवाहाचे वय (Marriage Age) वाढवण्याबाबत महत्वाची बातमी आहे. केंद्र सरकारने याबाबतचा प्रस्ताव तयार केला असून मंत्रिमंडळाने (Cabinet) या प्रस्तावाला मंजूरी दिल्याची माहिती सुत्रांनी दिली. देशात सध्या मुलींच्या विवाहाचे किमान वय 18 वर्षे एवढे आहे. आता हे वय 18 वरून 21 वर्षे करण्याचे प्रस्तावित आहे. यावर बुधवारी मंत्रिमंडळाच्या बैठकीत निर्णय घेण्यात आल्याचे समजते.

मुलांच्या लग्नाचे वय वाढवण्यासाठी कायद्यामध्ये बदल करावा लागणार आहे. मागील वर्षी पंतप्रधान नरेंद्र मोदी यांनी सर्वात आधी स्वातंत्र्य दिनी लाल किल्ल्यावरील आपल्या भाषणात याबाबतचे संकेत दिले होते. मुलींचे कुपोषणापासून रक्षण करण्यासाठी त्यांचे लग्न योग्यवेळी व्हायला हवे, असे मोदी म्हणाले होते. देशात सध्या पुरूषांचे लग्नाचे किमान वय 21 वर्षे तर मुलींचे किमान वय 18 एवढे आहे.

मुलींच्या लग्नाचे किमान वय वाढवण्यासाठी बाल विवाह विरोधी कायदा, विशेष विवाह कायदा आणि हिंदू विवाह कायद्यामध्ये सुधारणा करावी लागणार आहे. त्यासाठी केंद्र सरकारकडून सुधारित विधेयक मांडले जाणार आहे. याला मंत्रिमंडळामध्ये मंजूरी देण्यात आली आहे. नीती आयोगामध्ये जया जेटली यांच्या अध्यक्षतेखालील टास्क फोर्सने (Task Force) याबाबत शिफारस केली होती.

या टास्क फोर्समध्ये व्ही. के. पॉल यांच्यासह कुटुंब कल्याण, महिला व बाल विकास, उच्च शिक्षण, शालेय शिक्षम, कायदा मंत्रालयाचे सचिव या टास्क फोर्सचे सदस्य होते. मागील वर्षी जून महिन्यात या टास्क फोर्सची स्थापना करण्यात आली होती. मागील वर्षी डिसेंबर महिन्यात याबाबतचा अहवाल देण्यात आला होता.

टास्क फोर्सच्या म्हणण्यानुसार, पहिल्या मुलाला जन्म देताना महिलांचे वय 21 वर्ष असायला हवे. मुलींच्या लग्नाचे वय वाढल्याने कुटुंब, महिलांचे आरोग्य, मुले, समाजाचे आर्थिक, सामाजिक आणि आरोग्यावर सकारात्मक प्रभाव पडू शकतो, असे टास्क फोर्सने म्हटलं आहे.