Siddaramaiah : सिध्दरामय्या यांचा पत्नीबाबत मोठा दावा; म्हणाले, तो निर्णय आश्चर्यचकित करणारा!

Karnataka News : म्हैसूर शहरी विकास प्राधिकरण (MUDA) भूखंड घोटाळाप्रकरणी कर्नाटकचे मुख्यमंत्री सिध्दरामय्या यांच्या अडचणी वाढल्या आहेत. या कथित घोटाळ्यात आता ईडीची एन्ट्री झाली असून त्यांच्यावर गुन्हाही दाखल करण्यात आला आहे. त्यानंतर मुख्यमंत्र्यांच्या पत्नीने वादग्रस्त 14 भूखंड परत MUDA ला परत केल्याची माहिती खुद्द सिध्दरामय्या यांनीच दिली आहे.

पत्नी पार्वती यांनी परस्पर हा निर्णय घेतल्याचा मोठा दावा सिध्दरामय्या यांनी केला आहे. हा निर्णय आपल्यासाठी आश्चर्यचकित करणारा होता, असेही त्यांनी म्हटले आहे. ते म्हणाले, पत्नीने 14 भूखंड परत करण्याबाबत निर्णय घेतल्यानंतर मला आश्चर्य वाटले. राजकीय षडयंत्रामुळे माझ्या पत्नीला खूप भोगावे लागल्याचेही त्यांनी सांगितले. पण जमीन परत करण्याच्या निर्णयाचा मी आदर करतो, असे ते म्हणाले.

सिध्दरामय्या यांनी एक्सवर पोस्ट करत म्हटले आहे की, माझी पत्नी, पार्वतीने MUDA कडून कोणत्याही मोबदल्याशिवाय घेतलेली म्हैसूरमधील जमीन परत केली आहे. राजकीय हेतून प्रेरित झालेले आरोप विरोधकांनी माझ्यावर केल्याचे लोकांना माहिती आहे. या षडयंत्रामध्ये माझ्या कुटुंबालाही गोवण्यात आले.

कुणासमोरही न झुकता या अन्यायाविरोधात लढण्याची माझी ठाम भूमिका असल्याचे सांगत सिध्दरामय्या यांनी चौकशीला सामोरे जाण्याची तयारी दाखवली आहे. माझी पत्नी जवळपास चार दशके राजकारणापासून दूर राहिली. तिने स्वत:ला कुटुंबापुरतेच मर्यादित ठेवले. पण माझ्याविरोधात षडयंत्रामुळे तिला मानसिक त्रास झाल्याची नाराजी सिध्दरामय्या यांनी व्यक्त केली.

दरम्यान, सोमवारी रात्री सिध्दरामय्या यांच्यावर ईडीकडून मनी लाँड्रींगचा गुन्हा दाखल करण्यात आला आहे. त्यानंतर त्यांच्या पत्नी पार्वती यांनी MUDA आयुक्तांना पत्र लिहून आपण जमीन परत करत असल्याचे म्हटले होते. कर्नाटक लोकायुक्त पोलिसांनीही 27 सप्टेंबरला सिध्दरामय्या यांच्यासह इतरांवर गुन्हा दाखल केला आहे. या प्रकरणाची चौकशी पोलिसांनी मंगळवारपासून सुरू केली आहे.