भय्यू महाराजांना मनोरुग्ण बनवण्याचा होता कट; पलकने मांत्रिकाला दिली होती सुपारी

इंदोर : अध्यात्मिक गुरू भय्यू महाराज (Bhaiyyu Maharaj) यांच्या आत्महत्या प्रकरणात न्यायालयाने तिघांना दोषी धरत प्रत्येक सहा वर्षांची शिक्षा ठोठावली आहे. मुख्य सेवादार विनायक दुधाळे (Vinayak Dudhale), चालक, शरद देशमुख (Sharad Deshmukh) आणि शिष्या पलक पुराणिक यांना ही शिक्षा झाली आहे. याच पलकने एका मांत्रिकाला सुपारी देऊन भय्यू महाराजांना मनोरुग्ण बनवण्याचा कट आखला होता, असेही समोर आले आहे.

या प्रकरणात पलक पुराणिकच्या (Palak Puranik) व्हॉट्सअॅपच्या चॅटमधून अनेक धक्कादायक खुलासे झाले होते. या चॅटमध्ये भय्यू महाराजांचा उल्लेख बीएम असा करण्यात आला होता. भय्यू महाराजांना मनोरुग्ण बनवण्यासाठी तिने एका मांत्रिकाशी संपर्क साधला होता. तिने त्या मांत्रिकाला 25 लाख रुपयांची सुपारी दिली होती. जिजू नावाच्या व्यक्तीबरोबर झालेल्या चॅटमध्ये याबाबत उल्लेख होता. 'बीएम को पागल बनाकर घरमे बिठाना है, तांत्रिकको 25 लाखकी सुुपारी दी है,' असे पलकने म्हटले होते. या चॅटच्या आधारेच पोलिसांना या प्रकरणाच्या मुळापर्यंत पोचता आले. महाराजांसोबत लग्न करुन करोडोंच्या संपत्तीचा वारस होण्याचा पलकचा कट होता. याचबरोबर महाराजांचे अश्लील व्हिडीओ सोशल मीडियावर व्हायरल करण्याची धमकी देत पलक त्यांना ब्लॅकमेल करत असल्याचे समोर आले होते. (Bhaiyyu Maharaj News)

भय्यू महाराज यांनी स्वत:च्या रिव्हॉल्वरमधून गोळी झाडून घेत 12 जून 2018 रोजी आत्महत्या केली होती. यामुळे मोठी खळबळ उडाली होती. यानंतर सहाच महिन्यांत पलकसह तिघांना अटक करण्यात आली होती. तिघांना जानेवारी 2019 मध्ये अटक करण्यात आली होती. भय्यू महाराजांना आत्महत्या करण्यास प्रवृत्त केल्याचा ठपका पलकसह तिघांवर ठेवण्यात आला होता. आरोपींकडून त्यांना पैशांसाठी धमकावले जात होते, असेही न्यायालयात सिध्द झाले. त्यामुळे आयपीसी कलम 306 नुसार तिघांना दोषी धरत प्रत्येकी सहा वर्षांची शिक्षा सुनावण्यात आली. (Bhaiyyu Maharaj Suicide Case Updates)

या प्रकरणात न्यायालयात 32 साक्षीदार सादर करण्यात आले. इंदोर येथील सत्र न्यायाधीश धर्मेंद्र सोनी यांच्या न्यायालयात ही सुनावणी झाली. विनायक दुधाळेच्या वकिलांनी न्यायालयात सांगितले की, आत्महत्या करण्यापूर्वी भय्यूजींनी लिहिलेल्या चिठ्ठीमध्ये ट्रस्टची जबाबदारी विनायकवर सोपवली होती. संपत्ती नावावर केली नव्हती. त्यामुळे विनायकला फसवण्यात आले, असा दावा वकिलांनी केला. घटनेच्या काही दिवस आधी पुण्याला जात असताना भय्यूजींना सतत कुणाचे तरी फोन येत होते. पण त्याची चौकशी करण्यात आली नाही, असा मुद्दाही त्यांनी उपस्थित केली.

तिघांना अटक केल्यानंतर या प्रकरणाचा पर्दाफाश झाला होता. तिघे मिळून भय्यू महाराजांचे आर्थिक आणि मानसिक शोषण करत होते. त्यांनी सुसाईड नोटमध्ये विनायकचा उल्लेख केला होता. कारण विनायक हा त्यांचा 16 वर्षांपासूनचा सेवक होता. आत्महत्येनंतर त्यांचे मुलगी कुहू आणि दुसरी पत्नी आयुषी यांच्यातील वादही समोर आला होता. पण त्यानंतर झालेल्या तपासात या तिघांची नावे समोर आली होती.