PM Modi Big Statement : ठाकरेंनी युती तोडली, आम्ही नाही," ; NDA च्या बैठकीत मोदींचा पलटवार

New Delhi : सत्तेचं समसमान वाटप आणि मुख्यमंत्री पदावरून झालेल्या वादामुळे २०१९च्या निवडणुकीनंतर शिवसेना आणि भाजपची तीस वर्षांपासूनची युती तुटली. युती कुणामुळे तुटली, त्याला कोण जबाबदार यावर नेहमीच चर्चा होत असते. "ठाकरेंनी युती तोडली, आम्ही तोडली नाही," असे पंतप्रधान नरेंद्र मोदी म्हणाले. एनडीएच्या बैठकीनंतर ते बोलत होते. मोदींनी उद्धव ठाकरेंचा समाचार घेतला.

एनडीएच्या खासदारांची बैठक मंगळवारी नवी दिल्लीत महाराष्ट्र सदनामध्ये झाली. या बैठकीला केंद्रीय गृहमंत्री अमित शाह, केंद्रीय मंत्री राजनाथ सिंह, अर्जुन मेघवाल आणि जे पी नड्डा उपस्थित होते. पंतप्रधान मोदींनी काँग्रेसच्या अहंकारी उदाहरणांचा दाखला बैठकीत दिला. यापुढेही एनडीए म्हणून कायम एकत्र राहण्याचे आवाहन मोदींनी केले.

पवारांना पंतप्रधान पदाची संधी मिळाली नाही..

"काँग्रेस प्रमाणे भाजप अहंकारी नाही, त्यामुळे भाजप सत्तेवरून पायउतार होणार नाही. स्वार्थासाठी काँग्रेसने अनेक नेत्यांचे खच्चीकरण केलं. काँग्रेसच्या स्वार्थामुळे प्रणव मुखर्जी, शरद पवार यांच्यासारख्या दिग्गज नेत्यांना पंतप्रधान पदाची संधी मिळाली नाही," असे मोदींनी नमूद केले.

या दोन गोष्टी एकत्र कशा चालतील?

शिवसेनेचे (ठाकरे गट) मुखपत्र असलेल्या 'सामना'मधून नरेंद्र मोदी यांच्यावर टीका होत असते. यावर मोदी म्हणाले, "तुम्हाला सत्तेत पण राहायचे आहे आणि तुम्हाला आमच्यावर टीका पण करायची आहे या दोन गोष्टी एकत्र कशा चालतील? शिवसेना भाजपसोबत सत्तेत होती त्यावेळी सामना वृत्तपत्रात माझ्यवर टीका केली जायची. कारण नसताना वाद निर्माण होत असे. आम्ही अनेक वेळा सहन केले,"

Edited By : Mangesh Mahale