Raghav Chadha news : भाजपमध्ये जाताच लाखो फॉलोअर्स गेले, टोकाची टीका; अखेर राघव चड्ढा यांच्याकडून गौप्यस्फोट, म्हणाले, तीन पर्याय...

AAP crisis news : राज्यसभेचे खासदार राघव चड्ढा यांनी सहा खासदारांसह बंड करत भाजपमध्ये प्रवेश केला आहे. शुक्रवारी पत्रकार परिषदेत त्यांनी ही घोषणा करताच आम आदमी पक्षासह अन्य विरोधी पक्ष तसेच सोशल मीडियातही त्यांच्यावर टोकाची टीका झाली. चड्ढा यांचे सोशल मीडियातील लाखो फॉलोअर्स कमी झाले. त्यानंतर अखेर चार दिवसांनी त्यांनी आपले मौन सोडले आहे.

राघव चड्ढा यांनी सोशल मीडियात एक व्हिडीओ पोस्ट आप सोडण्याची आणि भाजपमध्ये प्रवेश करण्याबाबतची आपली भूमिका स्पष्ट केली आहे. आपल्या भूमिकेचे समर्थन करताना त्यांनी म्हटले आहे की, आता आम आदमी पक्ष बदलला आहे. पूर्वीसारखा राहिला नाही. या पक्षामध्ये आता काम करण्यासाठीचे वातावरण विषारी बनले आहे. काम करण्यापासून, संसदेत बोलण्यापासून रोखले जात होते.

मी माझ्या तारूण्यातील १५ वर्षे पक्षाला दिली. माझे करिअर बनविण्यासाठी राजकारणात आलेलो नाही, असे सांगत चढ्डा यांनी ‘योग्य व्यक्ती पण चुकीच्या पक्षात’या उक्तीचा वापर करत भाजप प्रवेशाचे समर्थन केले. हा निर्णय़ घेण्याआधी आपल्यासमोर तीन पर्याय होते, असा गौप्यस्फोटही त्यांनी केला आहे.

राजकारणातूनच बाहेर पडणे, पक्षात राहून बदल घडविणे आणि अन्य राजकीय पक्षात जाणे, हे तीन पर्याय होते. आपण तिसरा पर्याय निवडल्याचे चड्ढा यांनी स्पष्ट केले. एक व्यक्ती चुकीचा असू शकतो. पण सात खासदारांनी हा निर्णय घेतला आहे. सात जण चुकीचे असू शकत नाही, असेही चड्ढा यांनी स्पष्ट केले.

केंद्रीय तपास यंत्रणांच्या भीतीमुळे सात खासदारांनी भाजपमध्ये प्रवेश केल्याची टीकाही होत आहे. त्यावर बोलताना चड्ढा म्हणाले, आपण कोणत्याही भीतीपोटी पक्ष सोडलेला नाही. आमचा पक्षात भ्रमनिरास झाला म्हणून पक्ष सोडल्याचे त्यांनी स्पष्ट केले. आपमधून बाहेर पडलो याचा अर्थ तुमचे सार्वजनिक प्रश्न मांडणार नाही, असे नाही. मी लोकांच्या समस्या अधिक प्रभावीपणे मांडत राहीन, असे चड्ढा यांनी व्हिडीओमध्ये म्हटले आहे.