Rahul Gandhi: पुण्यातील जमीन व्यवहारावरून राहुल गांधीही आक्रमक; थेट PM मोदींशी जोडले कनेक्शन

पु्ण्यातील जमिन व्यवहार प्रकरणावरुन काँग्रेसचे नेते, विरोधी पक्षनेते राहुल गांधी यांनी थेट पंतप्रधान नरेंद्र मोदी यांचे नाव घेत टीका केली आहे. राहुल गांधी यांनी टि्वट करीत मोदींवर निशाणा साधला आहे. मोदींची तुमचं मौन खूप काही सांगून जातंय. दलितांचे आणि वंचितांचे हक्क हडपणाऱ्या या लुटारुंवर तुमचं सरकार टिकून आहे म्हणून तुम्ही शांत आहात का?, असा सवाल राहुल गांधींनी केला आहे.

मतचोरीनंतर सत्तेत आलेल्या सरकारची ही जमीन चोरी असल्याचे राहुल गांधी यांनी म्हटलं आहे. मोदी आणि भाजपवर त्यांनी हल्लाबोल केला आहे. पुण्यातील कोरेगाव पार्क-मुंढवा परिसरातील 40 एकर जमीन व्यवहार प्रकरणी उपमुख्यमंत्री अजित पवार यांचे सुपुत्र पार्थ पवार यांचं नाव समोर आले आहे. विरोधकांनी यावरुन अजित पवारांना घेरलं आहे. त्यांच्या राजीनाम्याची मागणी केली आहे.

जे सरकार स्वतः मत चोरी करुन सत्तेत आले आहे त्या सरकारची ही जमीन चोरी आहे. त्यांना माहिती आहे की कितीही लूटून नेलं तरी परत मतचोरी करुन सत्तेत परत येता येईल. त्यांना लोकशाहीची चिंता, ना जनतेची, ना दलितांच्या अधिकाराची चिंता आहे, असे राहुल गांधी यांनी 'x'वर म्हटले आहे. अजित पवार आणि सत्ताधारी भाजपवर टिका करताना त्यांनी मोदींवरही निशाणा साधला आहे.

"मोदींची तुमचं मौन खूप काही सांगून जातंय. दलितांचे आणि वंचितांचे हक्क हडपणाऱ्या या लुटारुंवर तुमचं सरकार टिकून आहे म्हणून तुम्ही शांत आहात का?, असा सवाल राहुल गांधी यांनी उपस्थित केला आहे.

महाराष्ट्रात 1800 कोटींची सरकारी जमीन जी दलितांसाठी आरक्षित (महार वतन) होती. ती फक्त 300 कोटींना मंत्र्याच्या मुलाच्या कंपनीसाठी विकण्यात आली. इतकंच नव्हे तर स्टॅम्प ड्युटीदेखील हटवण्यात आली. एकीकडे लूट आणि त्यावर कायदेशीर सूटही देण्यात आली, असे राहुल गांधी यांनी म्हटलं आहे.

पार्थ पवार आणि दिग्विजय पाटील यांच्या १ लाखांचे भाग भांडवल असलेल्या अमेडिया या कंपनीने मुंढवा परिसरातील महार वतनाची तब्बल 1804 कोटी किंमतीची जमीन, फक्त 300 कोटींत खरेदी केली असल्याचा आरोप विरोध केला आहे. या प्रकरणावर अजित पवारांनी स्पष्टीकरण दिले आहे. "माझा त्या व्यवहाराशी दुरान्वये संबंध नाही, मी कुणालाही फोन केला नाही किंवा चुकीच्या कामाला माझं कसलंही समर्थन नाही," अशी प्रतिक्रिया अजित पवारांनी दिली.