Maharashtra Election Controversy : महाराष्ट्राच्या निकालावर उत्तर देणाऱ्या निवडणूक आयोगाला राहुल गांधींनी डिवचले; म्हणाले,'दिशाभूल करणाऱ्या ...'

Rahul Gandhi News : राहुल गांधी यांनी वर्तमान पत्रांमध्ये लेख लिहून महाराष्ट्र विधानसभेच्या निवडणुकीवर आक्षेप नोंदवला होता. बनावट मतदार याद्या आणि बोगस मतदानाद्वारे ही निवडणूक भाजपने जिंकल्याचे राहुल गांधी यांनी म्हटले होते. तसेच निवडणूक आयोगाला देखील टार्गेट केले होते. आयोगाने यावर उत्तर देताना काँग्रेस तसेच काँग्रेसच्या अधिकृत एजंट्सनी मतदानाच्या दुसऱ्या दिवशी रिटर्निंग ऑफिसर तसेच निवडणूक निरक्षकांकडे कोणत्याही प्रकारची तक्रार केलेली नव्हती, असे म्हटले होते.

निवडणूक आयोगाने दिलेल्या उत्तरानंतर राहुल गांधींनी ट्विट करत म्हटले आहे की, 'प्रिय निवडणूक आयोग आपण एक घटनात्मक संस्था आहात. गंभीर प्रश्नांवर उत्तर देण्याचा मार्ग म्हणजे मध्यस्थांमार्फत निनावी व दिशाभूल करणाऱ्या टिपण्या प्रसिद्ध करणे नव्हे. आपल्याकडे लपवण्यासारखे काहीच नसेल, तर माझ्या लेखातील प्रश्नांची थेट उत्तरे द्या आणि कृती करून ते सिद्ध करा'

राहुल यांनी निवडणूक आयोगाला आवाहन करत म्हटले आहे की, 'तुमच्याकडे लपण्यासारखे काही नाही तर महाराष्ट्रासह सर्व राज्यांतील लोकसभा व विधानसभेच्या अलीकडील निवडणुकांसाठीचे एकत्रित, डिजिटल व मशीन-रीडेबल मतदार याद्या प्रकाशित करा. तसेच महाराष्ट्रातील सर्व मतदान केंद्रांतील संध्याकाळी ५ वाजल्यानंतरचे सीसीटीव्ही फुटेज जाहीर करा, टाळाटाळ केल्याने आपली विश्वासार्हता टिकणार नाही. सत्य सांगितल्यानेच ती टिकेल.'

देवेंद्र फडणवीसांचे उत्तर

राहुल गांधी यांनी लेख लिहून घेतलेल्या आक्षेपांना देवेंद्र फडणवीस यांनी देखील लेख लिहून उत्तर दिले आहे. 2009 च्या निवडणुकीत देखील लोकसभेनंतर विधानसभेत मतदारांची संख्या वाढली होती. तेव्हा काँग्रेस सत्तेत आली होती. असे फडणवीसांनी म्हटले आहे. तसेच माध्यमांशी बोलताना फडणवीस म्हणाले, लेखाचे उत्तर लेखाने दिले आहे. फॅट्स आणि फिगर दिले आहेत. त्यामुळे मला असं वाटतं आता तरी राहुल गांधी अशा प्रकारचे बोलणं सोडतील.