Pune Congress : काँग्रेस फुटीच्या उंबरठ्यावर! माजी आमदारासह सहा माजी नगरसेवक सोडणार साथ?

Pune News : विधानसभा निवडणुकीमध्ये दारुण पराभव झाल्यानंतर काँग्रेसमध्ये मोठ्या प्रमाणात संघटनात्मक बदल आणि हालचाली पाहायला मिळतील अशी अपेक्षा काँग्रेस कार्यकर्त्यांना होती. मात्र त्या प्रमाणात सध्या हालचाली होताना पाहायला मिळत नाही.त्यामुळे तीन ते चार वर्षांपासून स्थानिक स्वराज्य संस्थांच्या निवडणुकीची वाट पाहणाऱ्या काँग्रेसमधील इच्छुक उमेदवारांमध्ये काहीशी अस्वस्थता पाहायला मिळत आहे.

महाविकास आघाडी स्थानिक स्वराजसंस्थेमध्ये कायम राहिली की नाही याची देखील शंका उपस्थित केली जात आहे. या परिस्थितीमध्ये नगरसेवक, जिल्हा परिषद सदस्य आणि पंचायत समिती सदस्य होऊ इच्छिणाऱ्या काँग्रेसमधील इच्छुकांमध्ये प्रचंड धांदल उडाली आहे.

महाविकास आघाडी न झाल्यास आपल्या उमेदवारांना काँग्रेसची कितपत ताकद मिळेल याबाबत काँग्रेसमधील इच्छुकांच्या मनात शंकाकुशंकांचे वादळ सुरू झाले आहे.त्यामुळे सध्या काँग्रेस मधील काही नेते इतर महायुती पक्षांचा पर्याय आगामी स्थानिक स्वराज्य संस्थांच्या निवडणुकीसाठी चाचपताना दिसत आहेत.

पुण्यातील सहा माजी नगरसेवक आणि एक माजी आमदार आणि अनेक पदाधिकारी महायुतीतील इतर पक्षांमध्ये पक्ष प्रवेश करण्याबाबत चाचपणी करत असल्याचा समोर आले आहे.

स्थानिक स्वराज्य संस्थांच्या निवडणुकीच्या पार्श्वभूमीवर तिकिटाची हमी, पक्षामध्ये पद, महामंडळ तसेच इतर गोष्टींची वाटाघाटी करून पक्षप्रवेशाची तयारी करताना काँग्रेसमधील काही जण करत असल्याची चर्चा आहे.

काँग्रेस सोडून येण्याची चर्चा अंतिम टप्प्यात असून लवकरच काँग्रेस मधून एक मोठा गट फुटून पक्ष प्रवेश करेल अशी शक्यता सध्या निर्माण झाली आहे. काही जण अजित पवारांच्या राष्ट्रवादीच्या संपर्कात आहेत. तर काहींना शिंदेंच्या शिवसेनेचा पर्याय सोपा वाटत आहे. तर भाजपमध्ये इच्छुकांची प्रचंड स्पर्धा आहे. मात्र, सध्या तरी प्रवेश करू इच्छिणाऱ्यांना ठोस आश्वासन मिळत नसल्याने भाजपामध्ये जाऊ इच्छणारे 'वेट अँड वॉच'च्या भूमिकेत आहेत.

काँग्रेसमध्ये अस्वस्थता

स्थानिक स्वराज्य संस्थांच्या निवडणुकीच्या पार्श्वभूमीवर अनेक घडामोडी घडताना पाहायला मिळत आहेत. एकीकडे अनेक ठिकाणी भाजपकडून स्वबळाचा नारा देण्यात येत आहे. तर दुसरीकडे दोन्ही राष्ट्रवादी काँग्रेस एकत्र येणार का? याबाबत चर्चा सुरू आहे.

तसेच या चर्चेसोबत दोन्ही ठाकरे बंधू एकमेकांना टाळ्या देणार का? यावर देखील मोठ्या प्रमाणात खलबतं सुरू आहेत. सर्वच पक्षांमध्ये जोरदार घडामोडी घडत असताना दुसरीकडे मात्र काँग्रेसमध्ये निवडणुकीच्या तयारी सुरू नसल्याचे चित्र आहे. त्यामुळे काँग्रेसकडून इच्छुक असलेले संभ्रम अवस्थेत असून अनेक जण पक्षात अस्वस्थ असल्याचे देखील सांगितले जात आहे.