RahuI Gandhi : आमच्याकडे अ‍ॅटम बॉम्ब, तो फुटला तर..! राहुल गांधींनी वात पेटवली, महाराष्ट्राबाबत लवकरच करणार मोठा धमाका?

Election Commission Under Fire : काँग्रेसचे नेते आणि लोकसभेतील विरोधी पक्षनेते राहुल गांधी यांनी शुक्रवारी पुन्हा एकदा भारतीय निवडणूक आयोगावर गंभीर आरोप केले. तसेच आयोगातील अधिकाऱ्यांनाही इशारा दिला आहे. आयोगाकडून मतांची चोरी केली जात आहे. त्याचे 'ओपन अॅन्ड शट' पुरावे आमच्याकडे असल्याचे राहुल यांनी ठणकावरून सांगितले.

बिहारमधील मतदारयाद्यांची पुनर्पडताळणी असो की महाराष्ट्रातील विधानसभा निवडणूक असो, राहुल गांधींकडून सातत्याने आयोगावर निशाणा साधला जात आहे. ते म्हणाले, मतांच्या चोरीमध्ये निवडणूक आयोग सहभागी आहे. मी हे उगाच बोलत नाही. १०० टक्के पुराव्यांसह मी हे बोलत आहे. आम्ही हे पुरावे समोर आणले की संपूर्ण देशाला समजेल की, निवडणूक आयोग मतांची चोरी करत आणि कुणासाठी करत आहे?

निवडणूक आयोग भाजपसाठी हे करत आहे. हे 'ओपन अॅन्ड शट' आहे. याबाबत काही संभ्रम नाही. आम्हाला मध्य प्रदेशबाबत संशय होता. लोकसभेतही होता. महाराष्ट्रामध्ये आमचा संशय थोडा वाढला. राज्यस्तरावर मतांची चोरी झाल्याचे आम्हाला वाटले. एक कोटी मतदारांची नोंदणी झाली होती. आम्ही त्याच्या खोलात गेलो. पण आयोगाने आमची मदत केली नाही, असे राहुल म्हणाले.

आम्ही स्वत:च चौकशी केली. त्यासाठी सहा महिन्यांचा कालावधी लागला. आम्हाला जे मिळालंय, तो अॅटम बॉम्ब आहे. हा फुटला तर तुम्ही हिंदुस्तानात निवडणूक आयोग कुठेही दिसणार नाही, असे मोठं विधान राहुल गांधींनी केले आहे. राहुल गांधी यांनी अत्यंत आक्रमकपणे हे विधान केल्याने नेमके त्यांच्याकडे कोणते पुरावे आहेत, याबाबत आता चर्चांना उधाण आले आहे.  

मी हे खूप गंभीरपणे बोलत आहे की, निवडणूक आयोगात बसून जे कोणी हे काम करत आहेत, आम्ही तुम्हाला सोडणार नाही. कारण तुम्ही देशाविरोधात काम करत आहात. हा राजद्रोह आहे. तुम्ही कुठेही असाल, निवृत्त व्हा किंवा काहीही असोत. आम्ही तुम्हाला शोधून काढू. कर्नाटकात याचा खुलासा करू, असे राहुल यांनी स्पष्ट केले.