Rajya Sabha Election 2024 : राम मंदिराला 11 कोटी दान, बड्या उद्योगपतीला भाजपकडून राज्यसभेची 'लाॅटरी'

Rajya Sabha Election 2024 : जानेवारी महिन्यात राम मंदिरात प्राणप्रतिष्ठापणा सोहळा झाला. राम मंदिराच्या उद्घाटनाचा मुद्दा भाजप लोकसभा निवडणुकीत वापरणार. विरोधकांनीदेखील निवडणुकीसाठीच घाईघाईने राम मंदिरात प्राणप्रतिष्ठापणा सोहळा आयोजित केल्याची टीकादेखील भाजपवर केली होती. आता राम मंदिर उभारणीसाठी तब्बल 11 कोटी रुपयांचे दान देणाऱ्या गुजरातमधील बड्या उद्योगपतीला राज्यसभेची उमेदवारी दिली आहे. (Rajya Sabha Election 2024 )

सुरतमधील उद्योगपती गोविंदभाई ढोलकिया यांना भाजपने (BJP) गुजरातमधून राज्यसभेची उमेदवारी जाहीर केली आहे. गोविंदभाई ढोलकिया हे पाच हजार कोटी संपत्तीचे मालक आहेत. डायमंड सिटी असलेल्या सुरतमधून ते हिरे निर्यात करतात. राम मंदिर उभारणीसाठी त्यांनी 11 कोटी रुपये दान केले होते. 74 वर्षांचे गोविंदभाई ढोलकिया हे सहावी शिकलेले आहेत. 1992 मध्ये ते कारसेवा करण्यासाठीदेखील गेले होते.

गुजरातमधून राज्यसभेच्या चार जागांसाठी भाजपकडून जे. पी. नड्डा, गोविंदभाई ढोलकिया, मयंकभाई नायक, जशवंतसिंह परमार यांना उमेदवारी दिली आहे. भाजपकडे गुजरातमध्ये बहुमत असल्याने त्यांचे हे चारही उमेदवार निवडून येतील. गोविंदभाई यांनी सुरतमध्ये डायमंड कंपनीत कामगार म्हणून सुरुवात केली होती. पाच वर्षे काम केल्यानंतर त्यांनी आपल्या मित्रांसोबत मिळून स्वतःची कंपनी स्थापन केली.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

महाराष्ट्राप्रमाणे गुजरातमधील निवडणूकदेखील बिनविरोध होण्याची शक्यता आहे. महाराष्ट्रातून राज्यसभेसाठी भाजपने काँग्रेसमधून आलेले माजी मुख्यमंत्री अशोक चव्हाण, मेधा कुलकर्णी, अजित गोपछडे यांना उमेदवारी दिली आहे. राज्यसभेच्या 56 जागांसाठी निवडणूक होणार आहे. 27 फेब्रुवारीला राज्यसभा निवडणुकीसाठी मतदान होणार आहे.

(Edited By Roshan More)

R