Sharad Pawar Meet PM Modi : दिल्लीतील PM मोदींसोबतच्या भेटीत नेमकी चर्चा काय? शरद पवारांनी स्पष्टच सांगितलं

New Delhi News: महाराष्ट्राच्या राजकारणात सध्या मोठी उलाढाल होण्याची शक्यता वर्तवली जात आहे. एकीकडे महायुतीतील अंतर्गत वाद, उपमुख्यमंत्री एकनाथ शिंदेंची नाराजी, छगन भुजबळांचा बंडाचा पवित्रा तर दुसरीकडे शरद पवार आणि अजित पवार या काका-पुतण्यांची नुकतीच झालेली भेट आणि कालची मुख्यमंत्री देवेंद्र फडणवीस आणि उद्धव ठाकरेंची भेट.

या सर्व घटना पाहता राज्याच्या राजकारणात काय उलथापालथ होऊ शकते हे सांगणं कठीण झालं आहे. अशातच आता आणखी एक मोठी बातमी समोर आली आहे. ती म्हणजे दिल्लीमध्ये माजी केंद्रीय मंत्री आणि महाविकास आघाडीतील प्रमुख नेते शरद पवार (Sharad Pawar) यांनी संसद भवनात देशाचे पंतप्रधान नरेंद्र मोदी यांची भेट घेतली. पवारांनी ही भेट राजकीय नसल्याचं सांगितलं आहे.

मात्र, राज्यातील राजकारणात मोठमोठ्या उलाढाली सुरू असताना पवारांनी मोदींची (Narendra Modi) भेट घेतल्यामुळे अनेकांच्या भुवया उंचावल्या आहेत. शिवाय या भेटीवरून विविध राजकीय चर्चांना उधाण आलं आहे. नुकतंच काही दिवसांपूर्वी राज्याचे उपमुख्यमंत्री अजित पवार यांनी शरद पवारांच्या वाढदिवशी त्यांच्या दिल्लीतील निवासस्थानी जाऊन भेट घेतली आणि शुभेच्छा दिल्या होत्या.

तर त्याच दिवशी सांयकाळी केंद्रीय गृहमंत्री अमित शाह यांनी देखील शरद पवारांची भेट घेतल्यामुळे ते अजित पवार गटासोबत किंवा भाजपसोबत जाणार असल्याच्या चर्चांना उधाण आलं होतं. तेव्हापासून शरद पवार गटाच्या भूमिकेबाबतचा सस्पेन्स कायम आहे.

अशातच आज शरद पवारांनी पंतप्रधान मोदींची भेट घेतल्यामुळे वेगवेगळे तर्क वितर्क लढवले जात आहेत. मात्र, आजची भेट ही राजकीय नसून शेतीच्या विषयाशी संबंधित ही भेट असल्याचं पवारांनी सांगितलं आहे. दरम्यान, शरद पवार मोदींना भेटले त्यावेळी साताऱ्यातील दोन डाळिंब उत्पादक शेतकरी देखील त्यांच्यासोबत होते.

या भेटीत शेतकऱ्यांशी संबंधित प्रश्नावर चर्चा केली केल्याचं पवारांनी सांगितलं. तर यावेळी नरेंद्र मोदींसोबत कुठलीही राजकीय चर्चा झाली नाही. त्यांना भेट म्हणून डाळिंब दिली असून या भेटीचे राजकीय अर्थ निघू नयेत यासाठी केवळ पाच मिनिटांचीच ही भेट होती, असंही पवारांनी स्पष्ट केलं.