BJP leader father murder : भाजप नेत्यांच्या वडिलांची क्रूरपणे हत्या : तोंडात कागद कोंबले, डोळेही फोडले

उत्तर प्रदेशातील अलीगड जिल्ह्यातील चिलकौरा नगरिया गावात एक अतिशय धक्कादायक आणि अमानुष घटना समोर आली आहे. भाजप युवा मोर्चाचे मंडळ मंत्री पंकज राजपूत यांचे वडील आणि पेट्रोल पंप चालक नरोत्तम राजपूत (वय 55) यांची अत्यंत क्रूरपणे हत्या करण्यात आली. या घटनेमुळे परिसरात भीती आणि संतापाचे वातावरण पसरले आहे.

नरोत्तम राजपूत हे ‘सिटी एनर्जी’ नावाचा पेट्रोल पंप चालवत होते. तसेच त्यांचे कौडियागंज परिसरात तीन विटभट्टीही होते. मंगळवारी सकाळी सुमारे 10 वाजता ते त्यांच्या पत्नी पूनम यांच्यासोबत शेतात जनावरांसाठी चारा कापत होते. त्याचवेळी कन्हैया नावाचा त्यांचा ओळखीचा व्यक्ती तिथे आला आणि त्याने स्कूटीवर चिलकौरा पर्यंत सोडण्याची विनंती केली.

दोघेही एका बांधकाम सुरू असलेल्या घराजवळ पोहोचले. तेथे काही कारणावरून दोघांमध्ये वाद झाला. वाद वाढताच कन्हैयाने आपल्या साथीदारांच्या मदतीने नरोत्तम यांच्यावर हल्ला केला. धारदार शस्त्राने त्यांचा गळा चिरण्यात आला. इतक्यावरच न थांबता हल्लेखोरांनी त्यांच्या तोंडात कागद कोंबला आणि डोळेही फोडले. त्यानंतर मृतदेह त्या अपूर्ण घरात टाकून आरोपी पळून गेले.

दुपारपर्यंत नरोत्तम घरी परतले नाहीत, त्यामुळे कुटुंबीयांनी शोध सुरू केला. संशय आल्याने त्यांनी आरोपींकडे चौकशी केली, मात्र समाधानकारक उत्तर मिळाले नाही. अखेर बांधकाम सुरू असलेल्या घराचे कुलूप उघडल्यावर रक्ताने माखलेला मृतदेह आढळला. हे दृश्य पाहून कुटुंबीयांचा थरकाप उडाला.

घटनेची माहिती मिळताच पोलीस यंत्रणा तात्काळ घटनास्थळी दाखल झाली. वरिष्ठ पोलीस अधिकारी आणि अनेक पोलीस ठाण्यांचे पथक घटनास्थळी पोहोचले. संतप्त नागरिकांनी आरोपीच्या घरावर बुलडोझर चालवण्याची मागणी करत जवळपास 2 तास मृतदेह उचलू दिला नाही. पोलिसांनी समजूत काढल्यानंतरच मृतदेह ताब्यात घेतला.

या प्रकरणात मुख्य आरोपी कन्हैया फरार असून, त्याच्या दोन भावांना ताब्यात घेऊन चौकशी सुरू आहे. फॉरेन्सिक टीमने घटनास्थळावरून पुरावे गोळा केले आहेत. मात्र या हत्येमागचे नेमके कारण अद्याप स्पष्ट झालेले नाही.