Rahul Gandhi : …Love बोलायचे विसरून गेलो होतो! राहुल गांधींकडून 'तो' टी-शर्ट घालून प्रचार

Wayanad Lok Sabha Bypoll: वायनाड लोकसभा मतदारसंघाच्या पोटनिवडणुकीत काँग्रेसच्या उमेदवार व बहीण प्रियांका गांधी यांचा राहुल गांधींकडून जोरदार प्रचार केला जात आहे. सोमवारीही त्यांनी रोड शोद्वारे प्रियांका यांच्यासाठी चांगलीच बॅटिंग केली. यादरम्यान बोलताना त्यांनी राजकारणात प्रेम (Love) हा शब्द बोलायचे विसरून गेल्याचे विधान केले आहे.

राहुल गांधींनी भारत जोडो यात्रेची आठवण यावेळी सांगितली. ते म्हणाले, भारत जोडो यात्रेचा उद्देश राजकीय होतो. पण यात्रेच्या सुरुवातीलाच मी काही हैराण झालो. मी लोकांची गळाभेट घेत होतो, लोक मलाही प्रेम देत होते. मी तुमच्यावर प्रेम करतो, असे मी म्हणायचो. आम्हीही तुमच्यावर प्रेम करतो, असे लोक म्हणायचे.

आज विमानातून प्रवास करताना मला जाणवले की, अनेक वर्षे राजकारणात मी प्रेम शब्दाचा वापरच केला नाही, असे राहुल यांनी सांगितले. वायनाडमध्ये आल्यानंतर मी अचानक राजकारणात प्रेम शब्दाचा वापर सुरू केला, असे राहुल म्हणाले.

राहुल गांधी गांधी यांनी सोमवारी रोड शोदरम्यान ‘आय लव्ह वायनाड’ असे लिहिलेला पांढरा टी-शर्ट घातला होता. ‘मला जाणवले की, वायनाडमधील लोकांना मला प्रेम, स्नेह दिला. माझे संपूर्ण राजकारणच बदलून गेले. राजकारणात प्रेम शब्दाचे खूप महत्व असल्याचे लोकांनी मला शिकवले. म्हणून मी हा टी शर्ट घातल असल्याचे राहुल म्हणाले.

बहिणीला दिले चॅलेंज

राहुल गांधी यांनी बहीण प्रियांका यांना एक चॅलेंज दिले. ते म्हणाले, मी बहिणीला आव्हान देऊ इच्छितो. तिने वायनाडला सर्वात सुंदर पर्यटनस्थळ बनवावे. जेव्हा लोक केरळविषयी विचार करतील, तेव्हा ते सर्वातआधी वायनाडमध्ये यायला हवेत. यामुळे वायनाडचे लोक आणि येथील अर्थव्यवस्थेला फायदा होईल आणि जगालाही याची माहिती होईल, अशी अपेक्षा राहुल यांनी व्यक्त केली.