Wrestlers Protest: महिला कुस्तीपटूंचं आंदोलन पोलिसांकडून चिरडण्याचा प्रयत्न; महिला आयोगाने संतप्त होत थेट..

Delhi : दिल्लीत आज नवीन संसद भवनाचा उद्घाटन सोहळा मोठ्या दिमागात पार पडला. मात्र, दुसरीकडे महिला कुस्तीपटूंचे आंदोलन पोलिसांनी चिरडण्याचा प्रयत्न केल्यामुळे देशभरातून संतप्त प्रतिक्रिया उमटत आहेत.

दिल्लीत सुरु असलेल्या कुस्तीपटूंच्या आंदोलनात महिला कुस्तीपटूंना पोलिसांनी चुकीच्या पद्धतीने ताब्यात घेतल्याचा आरोप होत आहे. एवढंच नाही तर पोलिसांनी कुस्तीपटूंचा तंबूही हटवला असल्याची माहिती समोर आली आहे.

पोलीस आणि आंदोलक पैलवानांमध्ये जोरदार बाचाबाची झाल्याचंही समोर आलं आहे. या प्रकारावरून आता दिल्ली महिला आयोगानेही संतप्त होत दिल्ली पोलीस आयुक्तांना पत्र लिहिलं आहे.

महिला आयोगाने पत्रात म्हटलं की, बृजभूषण सिंह यांना पोलिसांनी अटक करावं, तसेच कुस्तीपटूंना ताब्यात घेतलेल्या पोलीस अधिकाऱ्यांवर कारवाई करण्यात यावी, अशी मागणी दिल्ली महिला आयोगाने केली आहे.

स्वाती मालीवाल काय म्हणाल्या?

दिल्ली महिला आयोगाच्या अध्यक्षा स्वाती मालीवाल म्हणाल्या, "जंतरमंतर येथे शांततेत आंदोलन करणाऱ्या महिला कुस्तीपटू आणि त्यांच्या कुटुंबियांना दिल्ली पोलिसांनी मारहाण केली. त्यांना जबरदस्तीने ताब्यात घेतल्याचं पाहून महिला आयोगाला खूप दुःख झालं. एका अल्पवयीन मुलीने खासदारावर लैंगिक छळाचा आरोप करून देखील दिल्ली पोलिसांनी आतापर्यंत त्यांना अटक केली नाही. हा घोर अन्याय नाही तर काय आहे?", असा सवाल त्यांनी उपस्थित केला.

"महिला कुस्तीपटूंना आणि त्यांच्या कुटुंबियांना दिल्ली पोलिसांनी मारहाण केली. जबरदस्तीने त्यांना ताब्यात घेत तेथून नेले. याचे व्हिडिओ देखील सोशल मीडियावर व्हायरल झाले आहेत. महिला कुस्तीपटूंना पोलिसांनी ज्या पद्धतीने रस्त्यावर ओढले ते अशोभनीय आहे, असून दिल्ली पोलिसांनी महिला कुस्तीपटू आणि त्यांच्या कुटुंबीयांची तात्काळ सुटका करावी, तसेच बृजभूषण सिंह यांना तातडीने अटक करावी", असं स्वाती मालीवाल यांनी म्हटलं आहे.

Edited By- Ganesh Thombare