Political Leaders Fitness : नेत्यांचा फिटनेस : 71 वर्षाचे माजी आमदार सांगतात, दररोज योगा का करावा..?

Fitness News : कव्हा (ता. जि. लातूर) हे आमचे गाव. वडील बळवंतराव पाटील हे गावचे पोलिस पाटील होते. त्यांनाही पहिल्यापासून व्यायामाची आवड होती. त्यांचा दराराही तसाच होता. त्यामुळे व्यायामाचे बाळकडू मला लहानपणीच मिळाले. हळूहळू शरीरालाही तशीच सवय झाली. पुढे चालून व्यायाम हा जीवनाचा अविभाज्य घटकच बनत गेला. पुढे लातूरला महाविद्यालयीन शिक्षण घेण्यासाठी आलो.

आर्य समाजाशी जोडलो गेलो. आर्यवीर दलाचे अध्यक्ष स्वामी डॉ. देवव्रत आचार्य यांचा सहवास मिळाला. योगासन, प्राणायाम, ध्यान, संध्या, अध्यात्माचे संस्कार त्यांच्याकडून मिळाले. ‘योग को जीवन का अंग बनावो’ हा मंत्र स्वामींनी दिला. योगामुळे शारिरीक व मानसिक दृष्ट्या तंदुरुस्त राहता येते.(Fitness) हे अनुभवायला मिळाले.

शाळेत असताना ‘ययाती’ कादंबरी वाचली होती. त्यातून वाचनाची आवड निर्माण झाली. वेगवेगळ्या महापुरुषांची पुस्तके वाचली. कोणाला खरेही वाटणार दररोज देवाची पूजा करीत असताना छत्रपती शिवाजी महाराज, स्वामी विवेकानंद , गौतम बुद्ध ,महात्मा बसवेश्वर यांची देखील पूजा करतो. यातून वेगळे समाधान मिळते, ऊर्जाही मिळते. गेल्या अनेक वर्षापासून राजकारणात आहे. संघर्षमय जीवनच गेले आहे. अशा काळात योगानेच साथ दिली.

आजही राजकारणासोबतच शैक्षणिक, सामाजिक, अध्यात्मिक क्षेत्रात काम करीत आहे. असे असताना दररोज नियमित पहाटे साडेपाच वाजता उठून दीड तास योग प्राणायाम करतो. परदेशात किंवा बाहेर गेल्यावरही माझा हा दिनक्रम ठरलेला आहे. आहाराच्या बाबतीत आता शाकाहारी आहे. राजीव दीक्षित यांच्यामुळे आहाराविषयीचे बरेच ज्ञान घेता आले. तेच फॉलो करीत आहे. पहाटे उठल्यानंतर तोंड धुण्यापूर्वी दोन ग्लास पाणी पितो. याचाही शरीराला फायदा होत आहे.

सकाळी ब्रेकफास्ट व दुपारी जेवण घेतो. रात्रीच्या वेळी मात्र जेवणाऐवजी फळ किंवा हालके अन्न घेतो. निरव्यसनी जीवन जगण्याचा आनंद घेत आहे. महर्षी पतंजली यांनी योगाची सुरवात केली. स्वामी रामदेव बाबा यांनी योगाला उंची प्राप्त करुन दिली. पंतप्रधान नरेंद्र मोदी यांनी योगाला जग मान्यता मिळवून दिली. योगाचे महत्व आता सर्वांनाच पटले आहे. लातूर येथे गेल्या ३५ वर्षापासून स्वामी डॉ. देवव्रत आचार्य यांचे मी योगासन शिबिर दरवर्षी घेत आहे. या शिबिराच्या माध्यमातून हजारो नागरिकांना योग साधक बनवता आले याचे समाधान आहे

जगात मोबाईल क्रांती झाली आहे. मोबाईलच्या माध्यमातून प्रचंड माहिती मिळत आहे. योगाची देखील भरपूर माहिती यातून मिळते. त्याचाही उपयोग होत आहे. योग हा प्राचीन आहे. तो कोणत्या एका जाती धर्माचा नाही. आपण जसे हवा, पाणी घेतो तसेच रोज योग घेतला पाहिजे. हाच वारसा घरातील मुलेही जपत आहेत.

योग, प्राणायाम हीच माझ्या फिटनेसची शक्ती आहे. त्यामुळे राजकारण असो किंवा इतर क्षेत्रात काम करताना कधीच थकवा जाणवत नाही. रात्रंदिवस काम करीत राहिलो तरी ऊर्जा कायम असते. समाजात फिरताना अनेक जण भेटतात. त्यांना ही योग, प्राणायाम करुन आनंदी जीवन जगण्याचा सल्ला देण्याचा माझा प्रयत्न असतो.