Kolhapur News : दिवंगत आमदार पी. एन. पाटील यांना काँग्रेसचे निष्ठावंत नेता म्हणून ओळखले जात होते. मात्र त्यांच्या निधनानंतर त्यांचे पुत्र राहुल पाटील यांचा विधानसभा निवडणुकीत पराभव झाला. या पराभवानंतर राहुल पाटील यांनी राष्ट्रवादीसोबत जाण्याचा निर्णय घेतला आहे. राष्ट्रवादी प्रवेशावर शिक्कामोर्तब झाले असून येत्या 25 ऑगस्ट रोजी त्यांचा महायुतीतील राष्ट्रवादीत प्रवेश होणार आहे.
आतापर्यंत काँग्रेसचा निष्ठावंत म्हणून हा गट ओळखला जात होता. मात्र आता पाटील गटाकडून काँग्रेस कार्यकर्त्यांकडून होणाऱ्या आरोपाला त्याच भाषेत उत्तर देत निष्ठेचा अध्याय नवा, अशा शब्दात वातावरण निर्मिती करत पक्षप्रवेशावर ठाम असल्याचे दाखवून दिले आहे. शिवाय निष्ठावंत काँग्रेस आणि निष्ठावंत पीएन पाटील गट हे देखील या माध्यमातून दाखवून दिले आहे.
जिल्हा परिषदेचे माजी अध्यक्ष राहुल पाटील, जिल्हा मध्यवर्ती बँकेचे राजेश पाटील यांच्यासह पीएन गटाचे प्रमुख पदाधिकारी, समर्थक व कार्यकर्ते यांचा प्रवेश निश्चित आहे. दिवंगत आमदार पी. एन. यांच्या पार्थिवावर सडोली खालसा येथे ज्या ठिकाणी अंत्यविधी करण्यात आले होते, त्या माळावर दुपारी बारा वाजता नवा राजकीय अध्याय सुरू होणार आहे. त्याची पाटील गटाने जय्यत तयारी सुरू केली आहे.
‘आदेश जनतेचा …नवीन प्रवास जनादेशासोबत’या आशयाचे स्टेट्स सध्या करवीर विधानसभा मतदारसंघातील पीएन पाटील गटाच्या कार्यकर्त्यांच्या व्हाट्सअप आणि मोबाईलवर झळकत आहेत. ‘निष्ठा तीच-अध्याय नवा सदैव भैय्यासोबत’म्हणून गट एकसंध असल्याचे दाखविले जात आहे. विधानसभा निवडणुककित पराभव झाल्यापासून राहुल पाटील यांच्या इतर पक्षातील पक्ष प्रवेशाच्या चर्चा सुरू होत्या. कधी भाजपात जाणार तर कधी राष्ट्रवादीत जाणार अशा चर्चा होत्या. भविष्यकालीन राजकीय वाटचाल, कारखान्याला उभारी, कार्यकर्त्यांचा सन्मान अशा विविध मुद्यावर राहुल पाटील आणि जिल्हा बँकेचे संचालक राजेश पाटील यांनी नव्या राजकीय प्रवासात राष्ट्रवादी काँग्रेस पक्षाचा पर्याय निवडावा यावर साऱ्यांचे एकमत झाले.
दुसरीकडे काँग्रेस नेते आणि जिल्हाध्यक्ष आमदार सतेज पाटील यांनी करवीर आणि राधानगरी विधानसभा मतदारसंघातील पीएन पाटील गटातील कार्यकर्त्यांची जिल्हा कार्यालयात बैठक घेत राहुल पाटील यांच्याबाबतची भूमिका जाहीर केली होती. त्यानंतर कार्यकर्त्यांकडून थेट राहुल पाटील यांनाच पाठिंबा देण्याचे स्टेट्स झळकल्यानंतर आगामी करवीर विधानसभा मतदारसंघातील काँग्रेस आणि राष्ट्रवादीतील अंतर्गत मतभेदाचे संकेत यानिमित्ताने मिळाले आहेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.