Kolhapur Politics News : स्वाभिमानीचं ऊसदर आंदोलन चिघळलं, निमशिरगावात अज्ञातांनी ट्रॅक्टर पेटवला !

Kolhapur Latest News : स्वाभिमानी शेतकरी संघटनेच्या वतीने ४०० रुपयांच्या दुसऱ्या हप्त्याच्या मागणीसाठी आंदोलन सुरू आहे. गेल्या 8 दिवसांपासून राजू शेट्टी यांची आक्रोश पदयात्रा सुरू आहे. ४०० रुपये दिल्याशिवाय साखर कारखाने सुरू करू नयेत, असा गर्भित इशारा स्वाभिमानी शेतकरी संघटनेने दिला होता. मात्र, अनेक कारखान्यांनी गाळप सुरू केल्याने आंदोलनाचा भडका उडाला आहे. अज्ञात कार्यकर्त्यांनी रात्री ऊस वाहतूक करणारा ट्रॅक्टर पेटवून दिला आहे. जोपर्यंत उसाचा हप्ता मिळत नाही, तोपर्यंत हंगाम सुरू करायचा नाही, अशा घोषणा या वेळी देण्यात आल्या. (Latest Marathi News)

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

चिपरी (ता. शिरोळ) येथील घोडावत जॉगरी कारखान्याने उसाची पहिली उचल जाहीर न करताच ऊस तोड सुरू केली होती. आज संध्याकाळी निमशिरगाव येथून उसाची वाहतूक सुरू असताना संतप्त कार्यकर्त्यांनी उसाचा ट्रॅक्टर पेटवून दिल्याची घटना मंगळवारी रात्री घडली आहे. दरम्यान, कारखानदारांनी मागणी न मान्य केल्याने पुढील काळात हे आंदोलन चिघळण्याची शक्यता आहे.

कारखानदार व सरकारचे अक्षम्य दुर्लक्ष

स्वाभिमानी शेतकरी संघटनेच्या वतीने मागील उर्वरित 400 रुपये द्यावेत, या मागणीसाठी आत्मक्लेश पदयात्रा सुरू आहे. या माध्यमातून शेट्टी यांनी कारखानदार आणि राज्य सरकारला टार्गेट केले आहे. साखर उद्योग संकटात असतो, तेव्हा साखर कारखानदार केंद्र सरकार अथवा राज्य सरकारकडे पाठपुरावा करून धोरण ठरविण्यास असमर्थ असून ईडी , सीबीआय व इन्कम टॅक्स विभागाच्या धास्तीने सरकारकडे पाठपुरावा करण्याऐवजी शेतकऱ्यांचाच बळी घेऊन मूग गिळून गप्प बसतात.

देशातील सर्वात जास्त महसूल देणाऱ्या साखर उद्योगाकडे कारखानदार व सरकारने अक्षम्य दुर्लक्ष केले असल्याचे मत स्वाभिमानी शेतकरी संघटनेचे संस्थापक राजू शेट्टी यांनी व्यक्त केले.

(Latest Marathi News)