रविकांत तुपकर भडकले; भुरट्या दादागिरीला भीक घालत नाही...

पंढरपूर : स्वाभिमानी शेतकरी संघटनेच्या कार्यकर्त्याला मारहाणीच्या निषेधार्थ आज स्वाभिमानी शेतकरी संघटनेचे युवा प्रदेशाध्यक्ष रविकांत तुपकर यांच्या नेतृत्वाखाली करमाळा तहसील कार्यालयावर मोर्चा काढण्यात आला. येथील मकाई सहकारी साखर कारखान्याचे अध्यक्ष दिग्विजय बागल यांनी मारहाण केली होती. या मारहाणीचे राज्यभरात तीव्र पडसाद उमटले आहेत. दरम्यान, रविकांत तुपकर म्हणाले, भुरटी दादागिरी आम्ही खपवून घेणार नाही. स्वाभिमानी शेतकरी संघटनेच्या कार्यकर्त्याला कोणी मारहाण केली तर त्यास त्याच पध्दतीने उत्तर दिले जाईल, असा इशारा त्यांनी दिला.

दोन दिवसांपूर्वी स्वाभिमानी युवा संघटनेचे सोलापूर जिल्हा अध्यक्ष विजय रणदिवे यांना करमाळा येथील मकाई सहकारी साखर कारखान्याचे अध्यक्ष दिग्विजय बागल यांनी मारहाण केली होती. या घटनेचा निषेध करण्यासाठी आज (सोमवार) स्वाभिमानी शेतकरी संघटनेचे युवा प्रदेशाध्यक्ष रविकांत तुपकर यांच्या नेतृत्वाखाली करमाळा येथील तहसील कार्यालयावर मोर्चा काढला. या मोर्चात सोलापूर जिल्हा स्वाभिमानी शेतकरी संघटनेसह शेतकरी मोठ्या संख्येने सहभागी झाले होते.

यावेळी माध्यमांशी बोलताना रविकांत तुपकर म्हणाले, भुरटी दादागिरी आम्ही खपवून घेणार नाही. स्वाभिमानी शेतकरी संघटनेच्या कार्यकर्त्याला कोणी अशा पद्धतीने मारहाण करण्याचा प्रयत्न केला तर स्वाभिमानी शेतकरी संघटना ही त्याच पद्धतीने उत्तर देईल. शेतक-यांच्या न्याय हक्कासाठी जीव गेला तरी बेहत्तर पण स्वाभिमानी शेतकरी संघटना आता गप्प बसणार नाही थकीत एफआरपीची रक्कम जमा व्हावी यासाठी मोठे आंदोलन छेडेल.

कारखान्यांनी आठ दिवसांत शेतक-यांना थकती एफआरपीची रक्कम द्यावी आणि बेकायदेशिररित्या गाळप करणा-यांवर कारवाई झाली पाहिजे. अन्यथा स्वाभिमानी शेतकरी संघटनेचे नेते राजू शेट्टी यांच्या नेतृत्वाखाली संपूर्ण महाराष्ट्रात आगाडोंब उसळल्याशिवाय राहणार नाही, असा इशारा त्यांनी दिला.