Ajit Pawar Death: माजी मंत्र्याला मिळाली होती सर्वात आधी अजितदादांच्या निधनाची बातमी; सगळं जळून खाक झालं!

Ajit Pawar Last Rites News: उपमुख्यमंत्री अजित पवार यांचा विमान अपघातात मृत्यू झाल्याने राजकीय वर्तुळासह त्यांच्या चाहत्यांना मोठा धक्का बसला आहे. त्यांच्या अत्यंविधीसाठी बारमती विद्या प्रतिष्ठानच्या मैदानावर जनसागर लोटला होता.

अजित पवार यांच्या विमान दुर्घटनेची सर्वात आधी माहिती महाराष्ट्राचे माजी आरोग्य मंत्री राजेश टोपे यांना मिळाली होती. पवार कुटुंबिय, प्रसार माध्यमांकडे ही बातमी पोहचण्यापूर्वी राजेश टोपे यांना ही माहिती मिळाली होती. याबाबत खुद्द राजेश टोपे यांनी जड अंतकरणाने ही माहिती माध्यमांना दिली.

राजेश टोपे म्हणाले,"माध्यमांकडे ही बातमी पोहोचण्याआधीच मला फोन आला होता. आमच्या जिल्ह्यातील एक तरुण बारामती विमानतळावर स्टोअर रूममध्ये काम करतो. त्याने सकाळी फोन करून सांगितले की अजितदादांच्या विमानाचा अपघात झाला आहे. विमानाचा शेवटचा भाग फक्त दिसतोय, उर्वरित सगळं जळून खाक झालं आहे”

काल (बुधवारी) सकाळी 8च्या सुमारास अजितदादा हे मुंबईहून सकाळी आठ वाजण्याच्या सुमारास विमानाने बारामतीला निघाले. 8.45 च्या सुमारास बारामतीजवळ विमान कोसळून अपघात घडला.त्यावेळी या अपघाताबाबत अधिकृत माहिती समोर आली नव्हती. त्यानंतर मात्र काहीच वेळाने अपघाताचे वृत्त समोर आलं अन् महाराष्ट्र हादरुन गेला.

जिल्हा परिषद, पंचायत समिती निवडणुकीच्या प्रचाराच्या चार सभा होत्या.सभेसाठी ते बारामती येत होते. विमान लँडिंगसाठी केवळ 40 ते 45 सेकंदांचा वेळ शिल्लक राहिला असताना होत्याचं नव्हतं झालं. अजित पवारांसह 5 जणांचा या भीषण अपघातात मृत्यू झाला.

अजितदादांच्या पार्थिवावर आज अंत्यसंस्कार करण्यात आले. कार्यकर्ते, नेते, मंत्री, कुटुंबिय यांनी दादांच्या पार्थिवाचे अखेरचे दर्शन घेतले. त्यानंतर त्यांना गॅार्ड अॅाफ अॅानर देऊन श्रद्धांजली वाहण्यात आली. त्यांचे दोन्ही पुत्र पार्थ पवार आणि जय पवार यांनी अजित पवार यांच्या पार्थिवाला मुखाग्नी दिला. मुख्यमंत्री देवेंद्र फडणवीस, उपमुख्यमंत्री एकनाथ शिंदे, केंद्रीय गृहमंत्री अमित शहा, भाजपचे राष्ट्रीय अध्यक्ष जे. पी. नड्डा यांच्यासह देश राज्यातील अनेक ज्येष्ठ नेते, प्रशासकीय अधिकारी आणि विविध क्षेत्रांतील मान्यवर उपस्थित होते.