Angar Election update : उज्ज्वला थिटेंचा मुलगाच होता सूचक, टॅक्टिक वापरून सही केली गायब; अजितदादांच्या नेत्याच्या दाव्याने खळबळ

Maharashtra local elections : सोलापूर जिल्ह्यातील अनगर नगरपंचायतीच्या नगराध्यक्षपदाची निवडणूक संपूर्ण राज्यात गाजत आहे. माजी आमदार राजन पाटील यांच्या सुनेविरोधात राष्ट्रवादी काँग्रेसकडून उज्ज्वला थिटे यांनी उमेदवारी अर्ज दाखल केला होता. कडेकोट बंदोबस्तात त्यांनी अर्ज भरला होता. पण छाननीमध्ये अर्ज बाद झाला आणि पुन्हा एकदा अनगरची निवडणूक प्रकाशझोतात आली आहे.

थिटेंच्या अर्जावर उमेदवाराची सही नसल्याने अर्ज बाद करण्यात आला आहे. मात्र, थिटेंसह राष्ट्रवादीचे नेते उमेश पाटील यांनी हा दावा फेटाळून लावत गंभीर आरोप केले आहेत. पाटील यांनी यामागे षडयंत्र असल्याचा दावा करताना म्हटले की, उज्जला थिटे यांच्या उमेदवारी अर्जासाठी त्यांचा मुलगाच सूचक आहे. त्याला विचारल्यानंतर त्याने सांगितले की, मी तीन ते चारवेळा आईची सही आहे की नाही ते पाहिले, माजी सही आहे की नाही ते पाहिले. असं असतानाही अर्ज बाद केला गेला.

आता सगळे म्हणत आहेत, तुम्हाला अर्ज दाखवतो. पण निश्चितपणे काहीतरी टॅक्टिक वापरून सूचकाची सही गायब करण्यात आली आहे. याची चौकशी व्हायला हवी. निवडणूक बिनविरोध करण्यासाठी हे षडयंत्र आहे. ते पळपुटे आहेत. आता पेनने लिहिलेले खोडरबरही मिळतात. ते ५० रुपयांत मिळतात. त्या रबराच्या सहाय्याने त्यांनी सही गायब केलेली असावी, असा संशय आहे. केवळ सहीच नाही, आणखी काही गोष्टी त्यांनी बदलल्या असल्याचा आरोप पाटील यांनी केला आहे.

थिटे म्हणाल्या, आपल्याविरोधात कुणी विरोधात उभे राहू नये म्हणून त्यांच्याकडून आधीच मतदारसंघातून नाव काढण्याचा प्रयत्न केला. मोठ्या गुन्ह्यातून माझा मुलगा सोडल्याचे ते सांगत होते. मग चार कागदं गायब करायला किती वेळ लागणार आहे. निवडणूक अधिकाऱ्यांनी मी सांगितले होते, भीतीमुळे आम्ही उद्या छाननीसाठी येऊ शकत नाही. आमचे वकीलही गेले नाहीत. त्याचाच फायदा त्यांनी घेतला. आम्ही सर्व कागदपत्रांची पुर्तता केली होती.

पाटील परिवाराविरोधात आधीपासूनच माझा लढा सुरू आहे. मुलाच्या दाखल्याची केस बाल हक्क आयोगात सुरू आहे. पोलिसांनी पुरावे मिटविले. पोलिसांविरोधातील केस मानवी हक्क आयोगात चालू आहे. आता माझा अर्ज बाद केल्याप्रकरणी जिल्हा न्यायालयात जाणार असल्याचे थिटे यांनी सांगितले.