Angar NagarPanchayat : राजन पाटलांना भिडणाऱ्या उज्ज्वला थिटेंचा अर्ज बाद कसा झाला? वाचा 'Inside Story'

Angar NagarPanchayat : राज्याचं लक्ष लागलेल्या अनगर नगरपंचायत निवडणुकीमध्ये नगराध्यक्षपदासाठी अर्ज दाखल केलेल्या राष्ट्रवादी काँग्रेसच्या उज्ज्वला थिटे यांचा अर्ज बाद झाला. यानंतर माजी आमदार, भाजप नेते राजन पाटील आणि त्यांचे चिरंजीव बाळराजे यांनी कार्यकर्त्यांच्या खांद्यावर बसून जल्लोष केला. या जल्लोषामध्ये बाळराजे यांनी उपमुख्यमंत्री अजित पवार यांचा एकेरी उल्लेख करत थेट चॅलेंज केलं. हा व्हिडीओ देखील चांगलाच व्हायरल होतो आहे.

पण उज्ज्वला थिटे यांचा अर्ज नेमका का आणि कसा बाद झाला? त्यांचा अर्ज बाद करण्यापूर्वी निवडणूक आयोगाने काय कारणं सांगितली? त्यांच्या अर्जावर आक्षेप कोणी घेतला होता? असे सवाल विचारले जात आहेत. याबाबत निवडणूक निर्णय अधिकारी सचिन मुळीक यांनी दिलेल्या माहितीनुसार, महाराष्ट्र नगरपालिका निवडणूक अधिनियम 1966 आणि नगरपंचायत नगराध्यक्ष थेट निवडीच्या अधिनियमानुसार अर्जाची चौकशी केली. त्यात उज्ज्वला थिटे यांचा अर्ज अवैध असल्याचे आढळून आले.

थिटेंच्या उमेदवारीमुळे लागली होती निवडणूक :

खरंतर 17 नगरसेवक बिनविरोध निवडून येऊन देखील उज्ज्वला थिटेंच्या उमेदवारीमुळे अनगर नगरपंचायतीच्या नगराध्यक्षपदासाठी निवडणूक लागली होती. नगराध्यक्षपदासाठी केवळ तीनच अर्ज आले होते. त्यात माजी आमदार राजन पाटील यांची सून प्राजक्ता अजिंक्यराणा पाटील यांचा भाजपकडून, थिटे यांनी राष्ट्रवादी काँग्रेसकडून आणि सरस्वती शिंदे यांनी अपक्ष अर्ज भरला होता.

नगराध्यक्षपदासाठी अवघे तीन अर्ज येऊनही प्रशासनाकडून दुपारी साडेतीनपर्यंत छाननीचे काम चालूच होते. उज्ज्वला थिटे यांचा उमेदवारी अर्ज राहणार की नाही, याकडे संपूर्ण राज्याचे लक्ष लागले होते. अखेर छाननीत थिटे यांचा अर्ज बाद झाल्याचे निवडणूक निर्णय अधिकारी सचिन मुळीक यांनी जाहीर केले. आता अपक्ष उमेदवार सरस्वती शिंदे निवडणुकीतून माघार घेण्याची शक्यता आहे.

अर्ज बाद कसा झाला? काय कारणे दिली?

राजन पाटील यांच्या गटाकडून थिटे यांच्या उमेदवारीवर एकही आक्षेप घेण्यात आला नव्हता, अपक्ष उमेदवार सरस्वती शिंदे यांनी सगळे आक्षेप घेतले होते. यात राष्ट्रवादी काँग्रेसच्या उज्ज्वला थिटे यांच्या अर्जावर सूचकाची सही नाही, थिटे यांचा मतदान यादीतील प्रभाग आणि अनुक्रमांक चुकीचा आहे, थिटे यांनी त्यांच्या वयाचा पुरावा अर्जासोबत जोडलेला नाही आणि सूचकाचा मतदान यादीतील अनुक्रमांक चुकीचा आहे, असे आक्षेप घेण्यात आले होते. हे सर्व आक्षेप ग्राह्य धरून थिटे यांचा अर्ज बाद घोषित करण्यात आला.