Sanjay Raut : मद्य घोटाळ्यात अटक केलेला अमित साळुंके शिंदे पिता-पुत्राचा निकटवर्तीय, संजय राऊतांचा धक्कादायक दावा

Sanjay Raut News : उपमुख्यमंत्री एकनाथ शिंदे आणि त्यांचे पुत्र खासदार श्रीकांत शिंदे यांच्यावर शिवसेना उद्धव बाळासाहेब ठाकरे पक्षाचे खासदार संजय राऊत यांनी गंभीर आरोप केला आहे. मद्य घोटाळ्याप्रकरणी झारखंडमधील पथकाने अमित साळुंखे याला अटक केली. हा अटक करण्यात आलेला अमित साळुंखे शिंदे पिता-पुत्राचा निकटवर्तीय असून तो श्रीकांत शिंदे मेडिकल फाऊंडेशनचा आर्थिक कणा असल्याचे राऊत म्हणाले.

संजय राऊत म्हणाले, 'राज्यात 800 कोटींचा अॅब्युलन्स टेंडर घोटाळा झाला. टेंडर साडेसहाशे कोटींनी वाढवले. आणि हे पैसे थेट श्रीकांत शिंदे फाऊंडेशनकडे वळवले. हा फाऊंडेशनचा आर्थिक कणा अमित साळुंखे आहे, हे सगळे पैसे श्रीकांत शिंदे फाऊंडेशनकडे वळवले याची चौकशी करायला मी सांगणार आहे.'

'झारखंडमधील मद्य घोटाळ्यात तेथून येथे एक पथक आलं. या पथकाने अमित साळुंकेला अटक केली. हा श्रीकांत शिंदे आणि एकनाथ शिंदेंच्या अत्यंत जवळचा माणूस आहे. ही अटक सहज झालेली नाही. सरकारला या पैशाला पाय कुठे फुटले, कुणाच्या खात्यात पैसे गेले हे प्रत्यक्ष अप्रत्यक्ष हे शोधायचे आहे. आणि हे धागेदोरे महाराष्ट्राच्या मंत्रिमंडळापर्यंत येतात.', असा दावा देखील संजय राऊत यांनी केला.

अमित साळुंखे हा सुमित फॅसिलिटीचा संचालक आहे. झारखंडमध्ये जो मद्य घोटाळा झाला त्यामध्ये पोलिसांनी मद्य व्यवसायिक सिद्धार्थ सिंघानिया याची चौकशी केली आणि त्यातूनच अमित साळुंखेची अटक झाली.

काय आहे मद्य घोटाळा?

झारखंड राज्य सरकारने छत्तीसगडमधील सरकारी दारू दुकानांच्या व्यवस्थापनाचा मॉडेल झारखंडमध्ये लागू केला होते. त्यामध्ये खासगी प्लेसमेंट एजन्सीजमार्फत कामगार पुरवले जात होते. त्याचे कंत्राट उद्योगपती सिंघानिया यांना मिळाले होते. यामध्ये सिंघानिया यांनी 450 कोटींचा भ्रष्टाचार केल्याचा आरोप आहे. त्यामध्ये अमित साळुंखे याचाही समावेश असल्याने त्याला अटक करण्यात आली आहे.