Satish Bhosle bail : बीडचा ‘खोक्या’ भाई पुन्हा चर्चेत ! जामीन मिळूनही कारागृहातून बाहेर पडता येणार नाही, काय कारण?

Khokya Bhai Beed : बीडमध्ये पैशांचे बंडल उधाळणारा भाजपचा पदाधिकारी आणि आमदार सुरेश धस यांचा जवळचा कार्यकर्ता अशी ओळख असलेला सतीश भोसले उर्फ खोक्या भाईचा जामीन अर्ज मंजूर करण्यात आला आहे. शिरूर पोलीस स्टेशनमध्ये त्याच्याविरोधात वन्यजीव संरक्षण कायद्यांतर्गत गुन्हा दाखल होता. या गुन्ह्यात त्याला जामीन मिळाला आहे. शिरूर कासारच्या दिवाणी आणि फौजदारी न्यायालयाने हा जामीन मंजूर केला आहे.

मात्र, सतीश भोसले उर्फ 'खोक्या' ला जामीन मिळाला असला तरी त्याचा मुक्काम जेलमध्येच राहणार असल्याचे सांगितले जात आहे. कारण त्याच्यावर 3 गुन्हे दाखल आहेत. त्यापैकी एकाच गुन्ह्यात त्याला जामीन मिळाला आहे. बॅटने मारहाण प्रकरण, आणि ढाकणे कुटुंबावर जीवघेणा हल्ला या प्रकरणात अद्याप त्याला जामीन मिळालेला नाही. केवळ वन्यजीव संरक्षण कायद्या अंतर्गत दाखल गुन्ह्यात सतीश भोसलेला जामीन मंजूर झाला आहे. त्यामुळे खोक्याचा मुक्काम हा जेलमध्येच राहणार आहे.

सध्या खोक्या बीड कारागृहातील न्यायालयीन कोठडीत आहे. खोक्याच्या घरावर पोलिसांनी व वनविभाने छापा टाकल्यानंतर वन्यप्राण्यांच्या शिकारीचे साहित्य, प्राण्यांचे मांस, गांजा आढळून आले होते. याप्रकरणी वकील राजन धसे यांनी युक्तिवाद केला. त्यानुसार शिरूर कासार येथील प्रथम वर्ग न्यायदंडाधिकारी यांनी त्याचा जामीन अर्ज मंजूर केला आहे.

वेगवेगळ्या प्रकरणांमुळे खोक्या चर्चेत आला होता. त्याचे पैशांचे बंडल उधाळतानाचा व्हिडीओ समोर आला होता. बुलढाणा जिल्ह्यातील एका व्यक्तीला बॅटने बेदम मारहाण करतानाचा खोक्याचा व्हिडिओ व्हायरल झाला होता. या प्रकरणी त्याच्यावर गुन्हा दाखल आहे. त्यानंतर शिरूर येथील दिलीप ढाकणे आणि त्यांचा मुलगा महेश ढाकणे यांना मारहाण केल्याप्रकरणी शिरूर पोलीस ठाण्यात सतीश भोसले वर दुसरा गुन्हा दाखल झाला होता. तसेच त्याच्या घराची तपासणी केली असता वन्य जीवांचे मांस आढळून आल्याने त्याच्यावर वन्यजीव संरक्षण कायद्यांतर्गत गुन्हा नोंदविण्यात आला होता.

त्यानंतर खोक्या हा अनेक दिवस फरार होता. पोलिस त्याच्या शोधात होते. त्याला प्रयागराज मधून पोलिसांनी बेड्या ठोकल्या होत्या. त्याआधी पोलिसांनी वनविभागाच्या जागेवर असलेल्या त्याच्या घरावर बुलडोजर चालवला होता. त्यानंतर रात्री त्याच्या घराला आग लागल्याची घटना घडली होती. त्यानंतर खोक्याची न्यायालयीन कोठडीत रवानगी करण्यात आली होती. सतीश भोसले (खोक्या) हा शिरूर कासार तालुक्यातील झापेवाडी येथील रहिवाशी आहे. मागील पाच वर्षांपासून तो राजकारणात सक्रिय असल्याचे सांगितले जाते. समाज माध्यमांवर वेगेवगळे दहशत पसरवणारे त्याचे व्हिडिओ व्हायरल झाल्यावर तो चर्चेत आला.