BJP Vs MNS : मनसेला हादरा! 'मोठा मित्रही लवकरच भाजपात…', रवींद्र चव्हाणांच्या सूचक वक्तव्याने खळबळ; माजी आमदार सोडणार साथ?

KDMC News : मतदानाला तीन दिवस शिल्लक असताना भाजपने कल्याण-डोंबिवलीचे मनसेचे माजी शहराध्यक्ष मनोज घरत यांना भाजपमध्ये प्रवेश दिला. घरत हे माजी आमदार राजू पाटील यांचे निकटवर्तीय म्हणून ओळखले जातात. मात्र, घरत यांनी साथ सोडल्याने मनसेला धक्का बसला आहे. त्यातच भाजप मनसेला अजून मोठा धक्का देण्याचे तयारीत असल्याचे सूचक वक्तव्य भाजप प्रदेशाध्यक्ष रवींद्र चव्हाण यांनी केले.

डोंबिवली पश्चिमेतील गोपीनाथ चौकात झालेल्या महायुतीच्या प्रचार मेळाव्यात मनोज घरत यांचा भाजपमध्ये प्रवेश झाला. यावेळी चव्हाण म्हणाले, “मोठा मित्रही लवकरच येणार आहे. ”

चव्हाण यांनी उल्लेख केलेला मोठा मित्र कोण याची चर्चा राजकीय वर्तुळात सुरू झाली आहे. मनसेचा माजी आमदार की उद्धव ठाकरेंच्या शिवसेनेतील मोठा नेता यांचा पक्षप्रवेशाचा संकेत दिल्याची चर्चा देखील दबक्या आवाजात सुरू आहे.

मनोज घरत हे आपले जुने मित्र असल्याचे सांगत रवींद्र चव्हाण म्हणाले, “विचारधारा समान असताना मित्र जास्त काळ वेगवेगळ्या वाटांवर राहू शकत नाहीत. आज मनोज घरत भाजपात आले, ही माझ्यासाठी आनंदाची बाब आहे. मला खात्री आहे की मोठा मित्रही लवकरच भाजपमध्ये प्रवेश करेल. फक्त योग्य वेळेची वाट पाहिली जात आहे.”

मनोज घरत यांनी आपल्या निर्णयाबाबत बोलताना सांगितले की, “वीस वर्षांच्या राजकीय प्रवासानंतर हा निर्णय जड अंतःकरणाने घेतला आहे. केंद्र आणि राज्यात महायुतीचे सरकार असून विकासासाठी योग्य व्यासपीठ मिळावे, या हेतूने भाजपात प्रवेश केला आहे.” राज ठाकरे यांच्याबद्दल आदर कायम असल्याचेही त्यांनी नमूद केले.

तो मित्र शिवसेनेतील की मनसेतील?

मनसेचे मनोज घरात यांचा भाजपमध्ये प्रवेश करतेवेळी मोठा मित्र देखील लवकरच येईल असे विधान चव्हाण यांनी केले असले तरी शिवसेना शिंदे गटाचे उमेदवार विकास म्हात्रे यांना संबोधून "विकासजी बरोबर ना" असे म्हणत विचारणा केली. यामुळे हे विधान नक्की मनसेच्या मित्राला होते की शिवसेना शिंदे गटातील मित्र पक्षाला होते, अशी देखील चर्चा राजकीय वर्तुळात रंगू लागली आहे.