BJP News : भाजपची विधानसभा अध्यक्षांवर पुन्हा मेहेरबानी; राहुल नार्वेकरांच्या घरात 3 तिकीट : फक्त इतर आमदारांसाठीच घराणेशाहीचा नियम?

BJP News : महापालिका निवडणुकीसाठी पुणे, नाशिक, नागपूर आणि इतर शहरात विद्यमान आमदार, मंत्री यांच्या कुटुंबात भाजपने घराणेशाहीचा नियम सांगून उमेदवारी नाकारली आहे. त्याचवेळी मुंबई महापालिकेसाठी विधानसभा अध्यक्ष राहुल नार्वेकर यांच्या घरात एकाचवेळी तिघांना उमेदवारी दिली आहे. त्यामुळे आधी आमदारकी, मग विधानसभा अध्यक्षपद आणि आता एकाचवेळी तिघांना उमेदवारी देत राहुल नार्वेकर हे पक्षासाठी किती महत्त्वाचे आहेत हे भाजपने दाखवून दिल्याची चर्चा आहे.

भाजपने राहुल नार्वेकर यांच्या कुटुंबातील 3 सदस्यांना निवडणूक रिंगणात उतरवले आहे. यात राहुल नार्वेकर यांचे बंधू मकरंद नार्वेकर, वहिनी हर्षिता नार्वेकर आणि चुलत बहीण गौरवी शिवलकर–नार्वेकर यांचा समावेश आहे. मकरंद नार्वेकर यांना प्रभाग क्रमांक 225 मधून, हर्षिता नार्वेकर यांना प्रभाग क्रमांक 226 मधून उमेदवारी दिली आहे. तर गौरवी यांना प्रभाग क्रमांक 227 मधून तिकीट दिले आहे.

त्याचवेळी महाराष्ट्रातील इतर शहरांमध्ये मात्र भाजपने घराणेशाहीचा नियम सांगत विद्यमान मंत्री, आमदार, खासदार यांच्या कुटुंबात उमेदवारी नाकारली आहे. पुणे शहरात मंत्री माधुरी मिसाळ यांचा मुलगा करण मिसाळ, आमदार सुनील कांबळे यांची मुलगी सुप्रिया कांबळे, खासदार, मंत्री मुरलीधर मोहोळ यांचा पुतण्या दुष्यंत मोहोळ, खासदार मेधा कुलकर्णी यांची मुलगी यांना उमेदवारी दिलेली नाही.

नाशिकमध्ये आमदार देवयानी फरांदे यांचा मुलगा अजिंक्य फरांदे, सीमा हिरे यांची मुलगी यांनी वाजतगाजत अर्ज दाखल केला होता. मात्र मंत्री गिरीश महाजन यांनी या सर्वांना एबी फॉर्म न देता अर्ज मागे घ्यायला लावले. कोल्हापूरमध्ये खासदार धनंजय महाडिक यांचे चिरंजीव कृष्णराज महाडिक यांनीही अर्ज मागे घेतला. नागपूरमध्ये आमदार कृष्णा खोपडे यांचे चिरंजीव रोहन खोपडे यांनाही भाजपने उमेदवारी दिलेली नाही.