सुधीर मुनगंटीवार यांच्या नाराजीनंतर चंद्रपूर जिल्ह्यातील राजकारणात मोठी हालचाल पाहायला मिळत आहे. मुख्यमंत्री देवेंद्र फडणवीस आणि मुनगंटीवार यांच्यात झालेल्या भेटीनंतर लगेचच भाजपने महत्त्वाचा निर्णय घेतल्याने राजकीय चर्चांना उधाण आले आहे. आमदार किशोर जोरगेवार यांना जिल्हा निवडणूक प्रमुख पदावरून हटवण्यात आले असून, त्यांच्या जागी माजी खासदार अजय संचेती यांच्याकडे ही जबाबदारी देण्यात आली आहे. या घडामोडींमुळे भाजपमधील अंतर्गत समीकरणे पुन्हा एकदा समोर आली आहेत.
निवडणुकांच्या पार्श्वभूमीवर भाजपने अचानक खांदेपालट केल्याने अनेकांना आश्चर्य वाटले. ऐन निवडणुकीच्या तोंडावर असा निर्णय घेतल्यामुळे किशोर जोरगेवार यांना मोठा धक्का बसल्याचे बोलले जात आहे. भाजपचे प्रदेशाध्यक्ष रवींद्र चव्हाण यांच्या आदेशानुसार हे बदल करण्यात आल्याचे सांगण्यात येत आहे. मात्र या निर्णयामागे मुनगंटीवार यांच्या नाराजीची भूमिका असल्याची जोरदार चर्चा सुरू आहे.
राज्यातील नगरपालिका निवडणुकांमध्ये भाजपने चांगली कामगिरी केली असून सर्वाधिक जागा जिंकत पक्षाने आपला दबदबा कायम ठेवला आहे. तरीही चंद्रपूर जिल्ह्यात भाजपला अपेक्षित यश मिळाले नाही. येथे पक्षाला केवळ दोन जागांवर समाधान मानावे लागले. या निकालानंतर सुधीर मुनगंटीवार यांनी अप्रत्यक्षपणे पक्षाच्या नेतृत्वावर नाराजी व्यक्त केली होती. मंत्रिपद नाकारल्यानंतर पक्षाने आपल्या मतदारसंघात ताकद कमी केली, असा सूचक आरोप त्यांनी केला होता. त्यांच्या या वक्तव्याचा रोख मुख्यमंत्री देवेंद्र फडणवीस यांच्याकडे असल्याचे राजकीय वर्तुळात मानले गेले.
या वक्तव्यानंतर दुसऱ्याच दिवशी मुनगंटीवार यांनी मुख्यमंत्री फडणवीस यांची भेट घेतली. या भेटीत त्यांनी चंद्रपूर जिल्ह्याच्या विकासासंदर्भात एक निवेदन दिले. या भेटीचा फोटो सोशल मीडियावर मोठ्या प्रमाणात व्हायरल झाला असून, त्यात दोन्ही नेत्यांचे चेहरे खुललेले दिसत आहेत. त्यामुळे या भेटीत नेमकी काय चर्चा झाली, याबाबत राजकीय वर्तुळात उत्सुकता वाढली आहे.
मुनगंटीवार हे वेळोवेळी पक्षाच्या धोरणांवर उघडपणे मत मांडताना दिसतात. हिवाळी अधिवेशनात त्यांनी मंत्री असोत वा चंद्रपूरमधील भाजप आमदार, सर्वांवरच टीका केली होती. संपूर्ण अधिवेशनात त्यांनी जणू विरोधी पक्षनेत्याची भूमिका घेतल्याचे चित्र दिसले. त्यांच्या या भूमिकेमुळे ते पक्षापासून दूर जातील का, अशीही चर्चा सुरू झाली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.