Ashok Chavan : चव्हाणांच्या राजीनाम्यावर बावनकुळेंची सूचक प्रतिक्रिया; म्हणाले, "भाजपचा दुपट्टा..."

काँग्रेसचे दिग्गज नेते आणि माजी मुख्यमंत्री अशोक चव्हाण ( Ashok Chavan ) भाजपत प्रवेश करण्याची शक्यता आहे. चव्हाणांनी पक्ष सदस्यत्वाचा राजीनामा दिला आहे. तसेच, अशोक चव्हाणांच्या आमदारकीचा राजीनामा विधानसभा अध्यक्ष राहुल नार्वेकर यांनी स्वीकारला आहे. चव्हाणांना भाजप राज्यसभेवर पाठवण्याची शक्यता आहे. अशातच भाजप प्रदेशाध्यक्ष चंद्रशेखर बावनकुळे यांनी प्रतिक्रिया व्यक्त केली आहे. ते मुंबईत प्रसारमाध्यमांशी संवाद साधत होते.

काँग्रेसचे दिग्गज नेते आणि माजी मुख्यमंत्री अशोक चव्हाण भाजपत प्रवेश करण्याची शक्यता आहे. चव्हाणांनी पक्ष सदस्यत्वाचा राजीनामा दिला आहे. तसेच, अशोक चव्हाणांच्या आमदारकीचा राजीनामा विधानसभा अध्यक्ष राहुल नार्वेकर यांनी स्वीकारला आहे. चव्हाणांना भाजप राज्यसभेवर पाठवण्याची शक्यता आहे. अशातच भाजप प्रदेशाध्यक्ष चंद्रशेखर बावनकुळे यांनी प्रतिक्रिया व्यक्त केली आहे. ते मुंबईत प्रसारमाध्यमांशी संवाद साधत होते.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

बावनकुळे म्हणाले, "काँग्रेसमध्ये मोठ्या प्रमाणात धुसफूस सुरू आहे. काँग्रेसमधील अंतर्गत वादावर समन्वय घडवण्याची क्षमता नेतृत्वात नाही. त्यामुळे अशोक चव्हाणांनी कोणत्या कारणाने पक्ष सदस्यत्वाचा राजीनामा दिला, हे पाहवं लागणार आहे. काँग्रेसमधील मोठे नेते भाजपच्या संपर्कात आहेत."

अशोक चव्हाणांना राज्यसभेवर पाठवणार असल्याची चर्चा आहे. याबद्दल प्रश्न विचारल्यावर बावनकुळेंनी म्हटलं, "भाजपचा अध्यक्ष या नात्यानं अद्याप कुठलीही चर्चा झाली नाही. पंतप्रधान नरेंद्र मोदी यांनी विकसित आणि आत्मनिर्भर भारताचा संकल्प केला आहे. विकसित भारताच्या संकल्पाला साथ देण्यासाठी भाजपचा दुपट्टा, विचारधारा कुणी स्वीकारत असेल, तर स्वागत आहे."

अशोक चव्हाणांनी पक्ष सदस्यत्वाचा राजीनामा दिला. तसेच, त्या पत्रावर हातानं माजी आमदार लिहिलं आहे. निश्चित काही बोलणं झालंय का? याकडे लक्ष वेधलं असता, बावनकुळे म्हणाले, "काहीही बोलणं झालं नाही. मोदींच्या विकसित भारताच्या संकल्पाला साथ देण्याकरता आणि आमच्या विचारधारेवर काम करण्यास तयार असणाऱ्यांसाठी आमचा दुपट्टा तयार आहे."

"तीन राज्यसभा उमेदवार निवडून येतील, एवढं संख्याबळ आमच्याकडे आहे. ही निवडणूक फार संघर्षाची होणार नाही. तीन भाजप, एक एकनाथ शिंदे, एक अजित पवार आणि महाविकास आघाडीची एक जागा निवडून येईल," असं बावनकुळेंनी सांगितलं.

अशोक चव्हाण भाजपत आले, तर फायदा होईल का? असा प्रश्न विचारल्यावर बावनकुळे म्हणाले, "कुठल्याही पक्ष प्रवेशाचा फायदा होत असतो. मग, बूथ, गाव किंवा देशातील प्रवेश असो. प्रत्येकाकडे क्षमता आणि वलय असते. मोदींचं वादळ भारतात येईल, तसं काँग्रेसचे अनेक नेते विकसित भारताच्या संकल्पाला साथ देतील."