BJP State Incharges: भाजपकडून महाराष्ट्रातील नेत्यांकडे दिल्लीसह पाच राज्यांची जबाबदारी : तावडेंकडे उत्तर प्रदेश, भारती पवार गोवा, कराड मिझोरामचे प्रभारी

BJP has appointed Maharashtra leaders: भारतीय जनता पक्षाने संघटनात्मक पातळीवर मोठे फेरबदल करत देशभरातील राज्ये आणि केंद्रशासित प्रदेशांसाठी नवे प्रभारी आणि सहप्रभारी जाहीर केले आहेत. या नव्या यादीत महाराष्ट्रातील पाच प्रमुख नेत्यांना महत्त्वाच्या जबाबदाऱ्या मिळाल्या आहेत. यात सर्वात महत्त्वाचे राज्य असलेल्या उत्तर प्रदेशचाही समावेश आहे.

विनोद तावडे यांच्याकडे उत्तर प्रदेशची धुरा सोपवण्यात आली असून डॉ. विनय सहस्रबुद्धे यांची दिल्लीच्या प्रभारीपदी नियुक्ती करण्यात आली आहे. डॉ. भारती पवार यांच्याकडे गोव्याची, तर डॉ. भागवत कराड यांच्याकडे मिझोरामची जबाबदारी देण्यात आली आहे. खासदार डॉ. मेधा कुलकर्णी यांचा उत्तर प्रदेशच्या सहप्रभारी म्हणून समावेश करण्यात आला आहे.

विशेष म्हणजे, उत्तर प्रदेशसारख्या राजकीयदृष्ट्या महत्त्वाच्या राज्यात विनोद तावडे यांच्यासोबत मेधा कुलकर्णी यांच्यासह चार सहप्रभारी काम करणार आहेत. उत्तर प्रदेशात २०२७ मध्ये विधानसभा निवडणूक होणार असल्याने भाजपच्या या नियुक्त्यांना संघटनात्मकदृष्ट्या महत्त्व आले आहे.

तावडेंकडे उत्तर प्रदेशची धुरा

भाजपचे राष्ट्रीय सरचिटणीस विनोद तावडे यांच्यावर पक्षाने उत्तर प्रदेशची मोठी जबाबदारी सोपवली आहे. विद्यार्थी दशेपासून अखिल भारतीय विद्यार्थी परिषदेतून संघटनात्मक राजकारणाला सुरुवात केलेल्या तावडेंना महाराष्ट्राच्या राजकारणाचा प्रदीर्घ अनुभव आहे. त्यांनी विधानपरिषदेतील विरोधी पक्षनेतेपद भूषवले असून २०१४ ते २०१९ या काळात महाराष्ट्र सरकारमध्ये शिक्षण, क्रीडा आणि सांस्कृतिक कार्यमंत्री म्हणूनही काम केले आहे.

राष्ट्रीय पातळीवर भाजपच्या संघटनात्मक कामात सक्रिय असलेल्या तावडेंकडे यापूर्वी बिहार आणि केरळसह विविध राज्यांच्या निवडणूक-संघटनात्मक जबाबदाऱ्या होत्या. आता देशातील सर्वाधिक विधानसभा जागा असलेल्या उत्तर प्रदेशची जबाबदारी त्यांच्याकडे देण्यात आली आहे. पक्षाच्या आगामी संघटनात्मक आणि निवडणूक तयारीच्या पार्श्वभूमीवर ही नियुक्ती महत्त्वाची मानली जात आहे.

तावडेंच्या मदतीला मेधा कुलकर्णी

पुण्याच्या राजकारणातून राज्याच्या राजकारणात आलेल्या डॉ. मेधा कुलकर्णी यांच्यावरही भाजपने मोठी जबाबदारी सोपवली आहे. पुणे महापालिकेतील नगरसेविका ते कोथरूडच्या आमदार असा त्यांचा राजकीय प्रवास राहिला आहे. सध्या त्या राज्यसभेच्या खासदार आहेत.

उत्तर प्रदेशच्या सहप्रभारीपदाची जबाबदारी त्यांना विनोद तावडे यांच्यासोबत देण्यात आली आहे. भाजपच्या अधिकृत यादीत उत्तर प्रदेशसाठी तावडे यांच्यासोबत जगदीश पटेल, मेधा कुलकर्णी, प्रदीप शर्मा आणि अनंत ओझा हे सहप्रभारी आहेत.

विनय सहस्रबुद्धेंकडे दिल्ली

भाजपचे ज्येष्ठ नेते आणि माजी राज्यसभा खासदार डॉ. विनय सहस्रबुद्धे यांच्याकडे दिल्लीची जबाबदारी देण्यात आली आहे. संघटन, वैचारिक प्रशिक्षण आणि धोरणात्मक विषयांवर काम करणाऱ्या सहस्रबुद्धे यांचा पक्षातील प्रदीर्घ अनुभव आहे. दिल्लीच्या प्रभारी म्हणून त्यांच्यासोबत जमयांग त्सेरिंग नामग्याल आणि दर्शना जरदोश यांची सहप्रभारी म्हणून नियुक्ती करण्यात आली आहे.

भारती पवार गोव्याच्या प्रभारी

दिंडोरीच्या माजी खासदार आणि माजी केंद्रीय आरोग्य राज्यमंत्री डॉ. भारती पवार यांच्यावर गोव्याची जबाबदारी देण्यात आली आहे. २०१९ मध्ये त्या दिंडोरी लोकसभा मतदारसंघातून विजयी झाल्या होत्या आणि केंद्रातील मोदी सरकारमध्ये आरोग्य व कुटुंब कल्याण राज्यमंत्री म्हणून त्यांनी काम केले. आता भाजपने त्यांना गोवा राज्याच्या प्रभारीपदी नियुक्त केले आहे. त्यांच्यासोबत अनिल अँटनी सहप्रभारी म्हणून काम पाहणार आहेत.

भागवत कराडांना ईशान्य भारताची जबाबदारी

मराठवाड्यातील भाजपचे ज्येष्ठ नेते डॉ. भागवत कराड यांच्याकडे मिझोरामची जबाबदारी देण्यात आली आहे. छत्रपती संभाजीनगरचे महापौर, राज्यसभा खासदार आणि केंद्रीय वित्त राज्यमंत्री असा त्यांचा राजकीय प्रवास राहिला आहे. भाजपच्या नव्या यादीत मिझोरामसाठी डॉ. भागवत कराड यांची प्रभारी म्हणून नियुक्ती करण्यात आली असून त्यांच्यासोबत कोणताही सहप्रभारी देण्यात आलेला नाही.

महाराष्ट्रातील नेत्यांना देशभरात ‘संधी’

भाजपच्या नव्या संघटनात्मक रचनेत महाराष्ट्रातील नेत्यांना मिळालेल्या या जबाबदाऱ्यांमुळे राज्यातील नेतृत्वाचा राष्ट्रीय संघटनात्मक कामातील सहभाग अधोरेखित झाला आहे. तावडेंना उत्तर प्रदेशासारख्या मोठ्या राज्याची, सहस्रबुद्धेंना दिल्लीची, भारती पवारांना गोव्याची आणि भागवत कराडांना मिझोरामची जबाबदारी मिळाली आहे. मेधा कुलकर्णी यांनाही उत्तर प्रदेशच्या संघटनात्मक कामात सहभागी करून घेण्यात आले आहे.

विशेषतः उत्तर प्रदेश, गोवा आणि इतर निवडणूकपूर्व तयारी असलेल्या राज्यांमध्ये भाजपने अनुभवी नेत्यांवर जबाबदारी सोपवली आहे. २०२७ च्या विधानसभा निवडणुकांच्या पार्श्वभूमीवर या नियुक्त्यांकडे पक्षाच्या पुढील संघटनात्मक तयारीचा भाग म्हणून पाहिले जात आहे.