Imtiaz Jaleel News: वंचितच्या नगरसेवकानं इम्तियाज यांच्यावर ठोकला 1 कोटींचा दावा! अब्रूनुकसानीची नोटीस

Imtiaz Jalil notice news: छत्रपती संभाजीनगर महानगरपालिकेच्या वतीने राबवण्यात येणाऱ्या रमाई आवास योजना अंतर्गत कोट्यावधींचा घोटाळा झाल्याचा आरोप एमआयएमचे प्रदेशाध्यक्ष इम्तियाज जलील यांनी केला होता. हा आरोप करताना त्यांनी सत्ताधारी भाजपसह वंचित बहुजन आघाडी व इतर पक्षांच्या काही नगरसेवकांची नावे घेतली होती.

यात प्रामुख्याने भाजपचे जालिंदर शेंडगे, वंचित बहुजन आघाडीचे नगरसेवक अमित भुईगळ, माजी नगरसेविकेचे पती महेंद्र सोनवणे यांचा समावेश होता. खोटी कागदपत्र तयार करून या सर्वांनी गोरगरीब दलित समाजातील रमाई घरकुल योजनेतील लाभार्थ्यांच्या नावावर प्रत्येकी अडीच लाख रुपयांचे अनुदान उचलून मोठा घोटाळा केल्याचा आरोप इम्तियाज जलील यांनी केला होता.

मतदान न केल्याचा राग

यावर वंचित बहुजन आघाडीचे नगरसेवक अमित भुईगळ यांनी आज आपल्या वकिलामार्फत इम्तियाज जलील यांना अब्रू नुकसानीचा दावा ठोकण्याचा इशारा देत एक कोटी रुपयांची नोटीस पाठवली आहे. इम्तियाज जलील यांनी रमाई आवास योजनेच्या माध्यमातून माझ्यासह काही नगरसेवकांवर सूडबुद्धीने आरोप केले आहेत. लोकसभा आणि त्यानंतर झालेल्या विधानसभा निवडणुकीत दलित समाजाने इम्तियाज जलील यांना मतदान न केल्याचा राग ते अशा पद्धतीने काढत आहेत.

मोर्चामध्ये सहभागी

मी गोरगरीब लोकांची कामे करतो म्हणून मला मतदारांनी दुसऱ्यांदा निवडून दिले. मात्र सातत्याने वंचित व मागासवर्गीय समाजाला टारगेट करण्याचा प्रयत्न इम्तियाज जलील यांच्याकडून सातत्याने सुरू आहे. त्यांच्या विरोधात आंबेडकरी जनतेने काढलेल्या मोर्चामध्ये मी सहभागी झाल्याचा रागही त्यांना आहे. तो त्यांनी बोलूनही दाखवला आहे.

अतुल सावे यांच्या आदेशावरून?

रमाई आवास योजनेत कोणत्याही प्रकारचा घोटाळा झालेला नसून इम्तियाज जलील हे आम्हाला विनाकारण लक्ष करत आहेत. त्यामुळे मी वकिलांमार्फत त्यांना अब्रू नुकसानीचा दावा ठोकत एक कोटी रुपयांची नोटीस पाठवली असल्याचे अमित भुईगळ यांनी सांगितले. दरम्यान इम्तियाज जलील यांनी महानगरपालिकेच्या अधिकाऱ्यांनी ओबीसी मंत्री अतुल सावे यांच्या आदेशावरून रमाई आवास योजना घोटाळा केल्याचा आरोप केला होता.