Santosh Deshmukh Case : 'सीएम'च्या सूचनेनंतर यंत्रणा हलली; मोठी अपडेट घेऊन तपास अधिकारी देशमुख कुटुंबीयांच्या भेटीला जाणार

Beed News : बीड येथील संतोष देशमुख खून प्रकरणाचा तपास करणारे बीडचे एसपी आणि सीआयडी अधिकाऱ्यांना मुख्यमंत्री देवेंद्र फडणवीस यांनी सोमवारी दुपारी फोन केला. यावेळी त्यांनी या प्रकरणाचा तपास करताना जे कोणी दोषी आढळतील त्यांच्यावर कठोर कारवाई करण्याच्या सूचना त्यांनी केल्या होत्या. त्यासोबतच आतापर्यंत झालेल्या तपास कामांचा आढावादेखील यावेळी पोलीस अधिकाऱ्यांकडून घेण्यात आला. त्यानंतर आता या प्रकरणात मोठी अपडेट येत आहे. मुख्यमंत्र्यांच्या सूचनेनंतर या प्रकरणाचा तपास करणारे अधिकारी देशमुख कुटुंबीयांची भेट घेऊन या प्रकरणातील तपासाची माहिती देणार आहेत.

मुख्यमंत्री देवेंद्र फडणवीस (Devendra Fadanvis) यांनी या प्रकरणाचा तपास करणाऱ्या बीडचे एसपी आणि सीआयडी अधिकाऱ्यांना फोन करून सूचना केल्या होत्या. त्यानंतर यंत्रणा कामाला लागली आहे. मुख्यमंत्र्यांच्या सूचनेनंतर या प्रकरणाचा तपास करणारे अधिकारी बसवराज तेली, सचिन पाटील हे केज येथील विश्रामगृहावर जाऊन देशमुख कुटुंबीयांची भेट घेणार आहेत. त्यासोबतच आतापर्यंत करण्यात आलेल्या या प्रकरणातील तपासाची माहिती देणार असल्याचे समजते .

दरम्यान, सोमवारी दुपारी मुख्यमंत्री फडणवीस यांनी या प्रकरणाचा तपास करताना जे कोणी दोषी आढळतील त्यांच्यावर कारवाई करण्याच्या सूचना देखील दिल्या आहेत.

दरम्यान, या घटनेनंतर राज्यातील वातावरण चांगलेच तापले आहे. या प्रकरणी सोमवारी देशमुख कुटुंबबियानी आक्रमक होत आंदोलन केले होते. या आंदोलनावेळी जोरात गदारोळ झाल्याचे पाहायला मिळाले.

दरम्यान, संतोष देशमुख हत्या प्रकरणातील आरोपींना कठोर शासन करा. ज्यावर खंडणीचा आरोपी आहे त्यांच्यावर मोक्का लावला. खंडणीचे आणि खुनाचे आरोप एकच आहेत. जर त्यांच्यावर कारवाई नाही तर आंदोलन तीव्र करण्याचा इशारा मनोज जरांगे (Manoj Jarange) यांनी दिला.