Devendra Fadnavis : "फडणवीस हे हुशार, प्रामाणिक राजकारणी, भविष्यात...."; वाढदिवसानिमित्त उद्धव ठाकरेंकडून तोंडभरुन कौतुक

Devendra Fadnavis : मुख्यमंत्री देवेंद्र फडणवीस हे हुशार आणि प्रामाणिक राजकारणी आहेत, अशा शब्दांत उद्धव ठाकरे यांनी त्यांचं कौतुक केलं आहे. फडणवीसांचा आज वाढदिवस आहे, यानिमित्त मंत्री गिरीश महाजन यांच्या पुढाकारानं प्रकाशित करण्यात आलेल्या फडणवीसांच्या कार्यकर्तुत्वासंबंधीच्या 'महाराष्ट्र नायक' या पुस्तकात उद्धव ठाकरे तसंच शरद पवार यांनी कौतुकाची थाप दिली आहे. तसंच इतर सर्वपक्षीय राजकीय नेत्यांनी देखील आपल्या फडणवीसांप्रती आपल्या भावना व्यक्त केल्या आहेत.

उद्धव ठाकरेंनी यात लिहिलंय की, "पित्याचा वारसा समर्थपणे चालवणारा मेहनती नेता म्हणजे देवेंद्र फडणवीस. ते हुशार आणि प्रामाणिक राजकारणी असून सामान्य नागरिकांना केंद्रस्थानी ठेवून राजकारण करतात. यामुळं त्यांना भविष्यात केंद्रात महत्वाची जबाबदारी मिळू शकते"

तर फडणवीसांच्या कामाची गती अफाट आहे, त्यांचे कष्ट पाहून ते थकत कसे नाहीत? असा प्रश्न मलाही पडतो. अशा शब्दांत ज्येष्ठ नेते शरद पवार यांनी त्यांच्या कार्यकर्तुत्वाचा उल्लेख केला आहे.

दरम्यान, फडणवीसांच्या वाढदिवसानिमित्त गडचिरोलीत विविध विकासकामांचं उद्घाटन आणि भूमिपूजन करण्यात आलं. या प्रकल्पांसाठी २४,००० कोटींची गुंतवणूक करण्यात आली आहे. तर १०,००० नागरिकांना रोजगार मिळणार आहे.