Anjali Damania Video : 'अंजली दमानियांच्या मागे देवेंद्र फडणवीस...', स्वत:च सांगितली पडद्यामागची गोष्ट

Anjali Damania News : सामाजिक कार्यकर्त्या अंजली दमानिया यांच्या मार्फत देवेंद्र फडणवीस हे आपल्या विरोधकांना संपवत असल्याचा आरोप होत होता. एकनाथ खडसे यांनी हा आरोप केला होता. त्यानंतर सिंचन घोटाळ्याचे कागदपत्रे फडणवीसांनीच दमानिया यांनी दिले होते, अशी चर्चा होती. मात्र, आपल्या मागे खरच फडणवीस आहेत का? याचे उत्तर दमानिया यांनी 'साम टिव्ही'ला दिलेल्या मुलाखतीमध्ये दिले आहे.

अंजली दमानिया म्हणाल्या, 'मी सिंचन घोटाळ्याचा अभ्यास केला होता. त्यातील बारीक सारीक तपशील तपासले होते. या संदर्भात कागदपत्रे घेऊन मी अनेक संपादकांना भेटले होते. एकनाथ खडसेंना भेटले तेव्हा मला सांगण्यात आले की एक अभ्यासू आमदार आहेत देवेंद्र फडणवीस त्यांना भेटा'.

'मी देवेंद्र फडणवीस यांना भेटले. त्यांना सिंचन घोटाळ्याच्या संदर्भातील कागदपत्रे दिली. त्यांनी ते प्रकरण लावून धरले. लोक म्हणतात की फडणवीसांनी मला सिंचन घोटाळ्याची कागदपत्रे दिली मात्र हे उलटे होते. मीच त्यांना कागदपत्रे दिली', असे देखील दमानिया यांनी सांगितले.

'देवेंद्र फडणवीस यांनी सिंचन घोटाळ्याचे प्रकरण लावून धरल्याने मी म्हटले होते की मला देवेंद्र फडणवीस आणि त्यावेळचे मुख्यमंत्री पृथ्वीराज चव्हाण यांच्या विषयी आदर आहे. मात्र, ज्यांच्यावर सिंचन घोटाळ्याचे आरोप होते त्या अजित पवारांच्या सोबत फडणवीसांनी शपथ घेतली तेव्हा माझी तळपायाची आग मस्तकात गेली.', असे दमानिया यांनी म्हटले.

'फडणवीसांना मी चांगला माणुस समजत होते. तसच मी केजरीवाल यांना देखील चांगले समजत होते. जर ही माणसं चांगली तर मग वाईट काय होती? ', असा टोलाही दमानिया यांनी लगावला.

राष्ट्रवादीला टार्गेट का?

अंजली दमानिया या राष्ट्रवादी काँग्रेसमधील नेत्यांना टार्गेट करत असल्याचा आरोप केला जातो? यावर बोलताना त्या म्हणाल्या, मी भ्रष्टाचाराच्या विरोधात लढते. ज्यांनी भ्रष्टाचार केला त्यांच्या विरोधात बोलले. मी एकनाथ खडसे, नितीन गडकरी यांच्या विरोधातही लढले आहे. खडसेंच्या लोकांनी मला त्रास दिला. विविध ठिकाणी माझ्या विरोधात मानहानीचे दावे दाखल केले होते.