Maharashtra Politics : 'तुमचा रात्रीशी संबंध नाही', देवेंद्र फडणवीस अजित पवारांना म्हणाले अन्...

Ajit Pawar News : उपमुख्यमंत्री तथा अर्थमंत्री अजित पवार यांनी सोमवारी (ता.17) विधानसभेत अर्थसंकल्पावरील चर्चेला उत्तर दिले. विविध क्षेत्रांसाठी केलेल्या तरतुदींचा आढावा घेताना त्यांनी कृषी क्षेत्रात होणाऱ्या बदलांबद्दल माहिती दिली. कृषी क्षेत्रात कृत्रिम बुद्धिमत्तेचा (AI) वाढता वापर उत्पादनवाढीला कसा हातभार लावत आहे, याचे उदाहरण देताना त्यांनी ऊस उत्पादनाच्या वाढीचा उल्लेख केला.

आपल्या भाषणादरम्यान अजित पवार म्हणाले, “पूर्वी ऊस उत्पादनाचे टनेज 60-70 असायचे, पण आता ते 100 च्या पुढे गेले आहे. प्रत्यक्ष अप्रत्यक्षपणे शेतकऱ्यांना याचा फायदा होत आहे. खरं तर टनेज 145 पर्यंत पोहोचलंय, पण मी 100 च सांगितलं. नाहीतर पुन्हा कोणी म्हणेल की हा दिवसा बोलतोय की रात्री!”

यावर मुख्यमंत्री देवेंद्र फडणवीस यांनी तत्काळ मिश्किल टिप्पणी केली, “तुमचा रात्रीशी संबंध नाही.” यावर अजित पवारांनीही हसत हसत उत्तर दिले, “हे तुम्हाला माहिती आहे, त्यांना नाही.” या दोघांच्या विनोदी संवादामुळे संपूर्ण सभागृह हास्यकल्लोळात न्हाऊन निघाले.

राष्ट्रवादी काँग्रेस शरदचंद्र पवार पक्षाचे आमदार जयंत पाटील यांनी अर्थसंकल्पावार टीका केली होती. या टीकेला उत्तर देताना अजित पवार म्हणाले, जयंतराव स्वत:अर्थमंत्री राहिले असून त्यांच्याकडून अशा शब्दांची अपेक्षा नव्हती.

वडेट्टीवारांना सुनावले

अजित पवार म्हणाले, विजय वडेट्टीवार हे एकेकाळी राज्याचे विरोधी पक्षनेते होते. त्यांच्यासोबत काम करत होतो. पण भाषण करताना त्यांनी भावनेच्या भरात स्मारक बांधा, असे म्हटले. अरे कोणीची स्मारकं बांधा, कशाची स्मारकं बांधा. नाही तर 2029 मध्ये तुमची स्मारकं बांधायची तयारी करा. कुणाची स्मारकं. आम्हाला एवढ्या मतांनी निवडून दिलं म्हणून स्मारकं बांधायला निघालात का?

(२५ वर्षे पूर्ण करणारा ई-सकाळ आता का्ॅमस्कोअरमध्ये नंबर १. डिजिटल माध्यमांच्या क्षेत्रातली नवी झेप)