Maharashtra Politics : मुख्यमंत्री देवेंद्र फडणवीस, शरद पवार एकाच समितीत, नेमकं काय काम करणार ?

Fadnavis-Pawar Politics : महाराष्ट्रातील दिग्गज राजकीय नेते आता एकाच समितीमध्ये काम करणार आहेत. मुख्यमंत्री देवेंद्र फडणवीस यांच्या अध्यक्षतेखालील समितीमध्ये माजी केंद्रीय कृषीमंत्री, जेष्ठ नेते शरद पवार, माजी मुख्यमंत्री पृथ्वीराज चव्हाण, नारायण राणे यांचा देखील समावेश आहे. महाराष्ट्र-कर्नाटक सीमाप्रश्न सोडविण्यासाठी मुख्यमंत्र्यांच्या अध्यक्षतेखाली उच्चस्तरीय समितीमध्ये हे सर्वपक्षीय नेत काम करणार आहेत.

महाराष्ट्र-कर्नाटक यांच्यामधील वाद मिटवण्यासाठी या समितीची स्थापना 2000 मध्ये करण्यात आली होती. एकनाथ शिंदे हे मुख्यमंत्री असताना या समितीचे अध्यक्ष होते. मात्र, या समितीची पुनर्रचना करण्यात आली असून मुख्यमंत्री देवेंद्र फडणवीस हे समितीचे अध्यक्ष असणार आहे.

या समितीच्या माध्यमातून सीमावादासंबंधी धोरणात्मक निर्णय घेतले जातात. समितीचे निर्णय राजकीय आणि न्यायलयीन स्तरावर प्रभावीपणे मांडले जातात.

या समितीच्या सीमासमन्वयक मंत्री चंद्रकांत पाटील यांच्यावर जबाबदारी असणार असणार आहे. तसेच या समितीमध्ये उपमुख्यमंत्री अजित पवार, उपमुख्यमंत्री एकनाथ शिंदे, मंत्री शंभूराज देसाई, प्रकाश आबिटकर, आमदार जयंत पाटील, रोहित पाटील, सुरेश खाडे, सुधीर गाडगीळ, सचिन कल्याणशेट्टी, राजेश क्षीरसागर, प्रकाश आवाडे, विधानसभा विरोधी पक्षनेता आणि विधान परिषद विरोधी पक्षनेता यांचा समितीत समावेश असणार आहे.

विरोधी पक्षनेतेपद रिक्त तरी समितीमध्ये...

विधानसभा निवडणुकीत महायुतीला चांगले यश मिळाले तर महाविकास आघाडीतील एकाही पक्षाला विरोधी पक्षनेते पद मिळेल येवढे देखील संख्याबळ नाही. शिवसेना उद्धव बाळासाहेब ठाकरे पक्षाने विरोधी पक्षनेतेपदावर दावा सांगितला आहे. मात्र, त्यावर विधानसभाअध्यक्षांनी निर्णय घेतला नाही. त्यामुळे विधानसभेतील विरोधी पक्षनेतेपद रिक्त आहे. हे पद रिक्त असताना देखील महाराष्ट्र-कर्नाटक यांच्यामधील वाद मिटवण्यासाठीच्या उच्चस्तरीय समितीमध्ये विरोधी पक्षनेते यांना सदस्य म्हणून समावेश केलेला आहे.