Bjp News : धनंजय मुंडेंच्या राजीनाम्याबाबत भाजपच्या बड्या नेत्याने दिले 'हे' मोठे संकेत

Mumbai News : केज तालुक्यातील मस्साजोगमधील सरपंच संतोष देशमुख यांचे अपहरण करून हत्या करण्यात आली. त्यानंतर राज्यातील वातावरण चांगलेच तापले आहे. या घटनेला 24 दिवस पूर्ण झाले असले तरी फरार आरोपीना ताब्यात घेतलेले नाही. या घटनेचा मास्टरमाईंड वाल्मिक कराड मंगळवारी पुण्यात शरण आल्यानंतर त्याची रवानगी 15 दिवसाच्या कोठडीत करण्यात आली.

संतोष देशमुख हत्या प्रकरणाच्या तपासासाठी गुरुवारी एसआयटीचे पथक केजमध्ये दाखल झाले आहे. त्या पथकांकडून चौकशी सुरु करण्यात आली आहे. दुसरीकडे फरार आरोपींना अटक करण्याच्या मागणीसाठी विरोधक आक्रमक झाले आहेत तर मंत्री धनंजय मुंडेंच्या (Dhananjay Munde)राजीनाम्याची मागणी केली जात असताना आता जलसंपदामंत्री राधाकृष्ण विखे पाटील यांनी मोठे विधान केले आहे.

विरोधकांकडून सातत्याने मंत्री धनंजय मुंडेंच्या राजीनाम्याची मागणी केली जात असतानाच याबाबत प्रसार माध्यमांच्या प्रतिनिधीनी राज्याचे जलसंपदामंत्री राधाकृष्ण विखे पाटील (Radhakrishna Vikhe Patil) यांच्याकडे धनंजय मुंडेंच्या राजीनाम्याबाबत विचारणा केली असता विखे-पाटील म्हणाले, एसआयटी चौकशीचा अहवाल येऊ द्यात. त्यानंतर निर्णय घेतला जाईल, असे स्पष्ट उत्तर त्यांनी दिले.

त्यातच प्रसार माध्यमांशी बोलताना मंत्री धनंजय मुंडे यांनी या प्रकरणाशी माझा कसलाच संबंध नाही. त्यामुळे राजीनामा देण्याचा प्रश्नच नाही, असे म्हणत या प्रश्नाला बगल दिली. विरोधकांकडून केल्या जात असलेल्या आरोप मुंडे यांनी यावेळी फेटाळून लावले.

दरम्यान, संतोष देशमुख हत्या प्रकरणाचा तपास करण्यासाठी गुरुवारी एसआयटीचे पथक केजमध्ये दाखल झाले आहे. पथकाचे प्रमुख बसवराज तेली हे केजला पोहोचले असून ते या ठिकाणी सुरु असलेल्या तपासाचा आढावा घेणार आहेत. मस्सजोगचे सरपंच संतोष देशमुख यांचे बंधू धनंजय देशमुख यांची तेली घेणार आहेत. दरम्यान धनंजय देशमुख व एसआयटीचे इतर अधिकारी यांच्यात केज येथील शासकीय विश्रामगृहात चर्चा केली.