Eknath Shinde statement : किमान अभ्यास तरी करा; नाव न घेता एकनाथ शिंदेंचा उद्धव ठाकरेंना इशारा

Nagpur news : नागपूरमध्ये सोमवारपासून विधिमंडळाचे अधिवेशन होत आहे. या अधिवेशनाच्या पूर्वसंध्येला विरोधी पक्षाच्या नेत्यांनी चहापानावर बहिष्कार घातला. त्यानंतर आयोजित केलेल्या पत्रकार परिषदेत मुख्यमंत्री देवेंद्र फडणवीस, उपमुख्यमंत्री एकनाथ शिंदे यांनी विरोधी पक्षावर निशाणा साधला. किमान अभ्यास तरी करा, असे म्हणत नाव न घेता एकनाथ शिंदेंनी उद्धव ठाकरेंना टोला लगावला. महाविकास आघाडीतील मुख्यमंत्रीपद काय मग घटनाबाह्य होते का? असा सवालही त्यांनी केला.

हिवाळी अधिवेशनाच्या पार्श्वभूमीवर रविवारी पत्रकार परिषद घेत मुख्यमंत्री देवेंद्र फडणवीस व उपमुख्यमंत्री शिंदे यांनी विरोधकांवर टीका केली. आमचा अजेंडा खुर्चीसाठी नाही. आम्ही काम करणारे आहोत, ते स्पीडब्रेकरवाले आहेत, असा टोला राज्याचे उपमुख्यमंत्री एकनाथ शिंदे यांनी विरोधकांना लगावला. त्यांनी काही बोध घेतला पाहिजे. नुसती जळजळ मळमळ आहे. मी मुख्यमंत्री होतो तेव्हा घटनाबाह्य म्हणायचे, आता पण तेच सुरु आहे. किमान अभ्यास तरी करा असे म्हणत नाव न घेता एकनाथ शिंदेंनी (Ekanth shinde) उद्धव ठाकरेंना टोला लगावला. महाविकास आघाडीतील मुख्यमंत्रीपद काय मग घटनाबाह्य होतं का? असा सवालही त्यांनी केला.

विरोधी पक्ष या अधिवेशनात किती विदर्भातले प्रश्न उपस्थित करतो माहिती नाही. मात्र, आमची तयारी आहे. आरोग्य, सिंचन शेतकऱ्यांच्या प्रश्नांवर उत्तर देऊ असेही एकनाथ शिंदे म्हणाले. विरोधकांना गांभीर्याने घेऊ नका. लोकशाहीत मानसन्मान ठेवणारे आम्ही आहोत. विरोधी पक्ष नेता द्या, असे विरोधक म्हणत आहेत. पण ते अधिकार विधानसभा अध्यक्ष व सभापतींचे आहेत. लोकसभेत गेल्या वेळेस देखील विरोधी पक्ष नेता नव्हता. अडीच वर्षात अनेक कामे आम्ही केली आणि त्यामुळे मोठा विजय मिळाला असल्याचे एकनाथ शिंदे यांनी सांगितले.

सध्या राज्यातील विरोधी पक्ष निष्प्रभ दिसतोय. त्यांची अवस्था आपण पाहातोय. नगरपालिका निवडणुकीच्या प्रचारात कुठेच महाविकास आघाडी देखील दिसली नाही. त्यांचे नेते घरात होते, कार्यकर्त्यांची निवडणूक होती. आम्ही काही ठिकाणी एकत्र तर काही ठिकाणी वेगवेगळे लढलो. महायुतीला 70 ते 75 टक्के यश मिळेल अशी परिस्थिती असल्याचा विश्वास एकनाथ शिंदे यांनी व्यक्त केला.

त्यासोबतच विरोधकांना जळीस्थळी काष्टीपाशाणी फक्त एकनाथ शिंदे दिसत आहे. उद्यापासून नागरपूरमध्ये विधीमंडळाचे हिवाळी अधिवेशन सुरु होत आहे. विदर्भातील प्रश्नांना न्याय मिळाला पाहिजे ही शासनाची भूमिका आहे. सत्ताधारी पक्ष देखील समस्यांना आणि विकासाला न्याय देईल. बहिष्कारावर मी काही बोलू इच्छित नाही असे एकनाथ शिंदे म्हणाले.