BJP Vs Congress : 1 लाख मतांनी जिंकलेल्या भाजप आमदाराकडेही पक्ष प्रवेशासाठी रांगा : काँग्रेसचा सुपडासाफ करण्याचा दावा

BJP News : इनकमिंगवरून भाजपमध्येच आता मोठा असंतोष खदखदत आहे. नगरपालिका निवडणुकीत उमेदवारी देताना बाहेरच्यांना प्राधान्य दिल्याने अनेक ठिकाणी बंडखोरी झाली आहे. यानंतर भाजपने मात्र इनकमिंग बंद केले नाही. रोज कोणीतरी भाजपात प्रवेश करीत असल्याचे दिसून येते. यात एका लाखांच्या विक्रमी मताधिक्यांनी जिंकून आलेले भाजपचे नागपूर पूर्वचे आमदार कृष्णा खोपडे थांबायला तयार नाहीत. त्यांचा इनकमिंगचा आठवडी बाजार सुरूच आहे. नुकतंच शहरातील काँग्रेसच्या 25 ते 30 कार्यकर्त्यांनी भाजपमध्ये प्रवेश केला या माध्यमातून महापालिकेच्या निवडणुकीत शहराला काँग्रेसमुक्त करणार असल्याचा दावा त्यांनी केला आहे.

आमदार खोपडे यांना जायंट किलर म्हणून ओळखले जाते. साधे नगरसेवक असताना त्यांनी विधानसभेच्या निवडणुकीत काँग्रेसचे दिग्गज नेते आणि मंत्री सतीश चुतर्वेदी यांचा बालेकिल्ला उध्वस्त केला. या पराभवानंतर चतुर्वेदी राजकीय कारकीर्दच संपूण गेली. खोपडे यांच्याविरोधात त्यांची पुन्हा निवडणूक लढण्याची हिंमत झाली नाही. पुनर्वसनासाठी त्यांनी पूर्वऐवजी दक्षिण नागपूर विधानसभा मतदारसंघाची निवड करून बघितली. मात्र येथेही त्यांना यश आले नाही.

आता त्यांनी आपल्या पूर्व नागपूर या परंपरागत विधानसभा मतदारसंघावरचा दावाही सोडला आहे. कृष्णा खोपडे येथून सलग चारवेळा निवडून आले. लोकसभेच्या निवडणुकीत केंद्रीय मंत्री नितीन गडकरी यांना त्यांनी आपल्या मतदारसंघातून सर्वाधिक मताधिक्य मिळवून दिले. विधानसभा निवडणुकीत ते मुख्यमंत्री देवेंद्र फडणवीस यांच्यापेक्षा जास्त मताधिक्यांनी निवडून आले आहे. विदर्भातून सर्वाधिक मताधिक्यांनी निवडून आलेल्या आमदारांमध्ये खोपडे हे पहिल्या क्रमांकावर आहेत.

महापालिकेची निवडणूक भाजपचे स्वबळावर लढावी अशी मागणी खोपडे यांनी पक्षाकडे केली आहे. त्यांच्या विधानसभा मतदारसंघातून सर्वाधिक नगरसेवक भाजपचे निवडून येत आहेत. मित्र पक्षांसोबत घेऊन निवडून आणण्यास त्यांचा विरोधत आहे. त्यांच्या प्रभागात शरद पवारांच्या राष्ट्रवादी (NCP) काँग्रेसचा एक नगरसेवक निवडून आला होता. तोच विधानसभेच्या निवडणुकीत त्यांच्या विरोधात लढला. हे बघता खोपडे यांनी इनकमिंग सुरूच ठेवून विरोधक राहणार नाही याची दक्षता घेताना दिसत आहे. गटागटांत विभागलेला काँग्रेस पक्ष आज पूर्णपणे संपलेला आहे. कोणीच नेतृत्व करीत नसल्याने आणि भाजपने केलेली विकास कामे बघून सर्व कार्यकर्ते आता भाजपात (BJP) येत असल्याचा दावा खोपडे यांचा आहे.