Drought Relief: दुष्काळात काम हवंय? ‘रोहयो’च्या हेल्पलाइनवर फोन करा; 15 दिवसांत रोजगार मिळवा

Employment Guarantee Scheme: दुष्काळी परिस्थितीत ग्रामीण भागातील मजुरांना रोजगार उपलब्ध व्हावा, यासाठी प्रशासनाने महत्त्वाचे पाऊल उचलले आहे. महात्मा गांधी राष्ट्रीय ग्रामीण रोजगार हमी योजनेअंतर्गत (मनरेगा) कामाची गरज असलेल्या मजुरांना आता ग्रामपंचायत किंवा तालुका कार्यालयात वारंवार जाण्याची आवश्यकता नाही.

रोजगाराची मागणी नोंदवण्यासाठी जिल्हा प्रशासनाने हेल्पलाइन सुरू केली आहे. या क्रमांकावर फोन करून मजुरांना कामाची मागणी नोंदवता येणार असून, नियमानुसार १५ दिवसांच्या आत रोजगार उपलब्ध करून देण्याची व्यवस्था करण्यात आली आहे.

ग्रामीण भागात रोजगाराची गरज असलेल्या कुटुंबांना या सुविधेमुळे दिलासा मिळण्याची अपेक्षा आहे. विकसित भारत रोजगार आणि आजीविका हमी अभियान (ग्रामीण) अर्थात ‘व्हीबी-जी राम जी’ अंतर्गत ही सुविधा उपलब्ध करून देण्यात आली आहे. रोजगार मिळवण्यासाठी अर्ज कुठे करायचा, कोणाकडे संपर्क साधायचा, याबाबतची अडचण दूर करण्याचा प्रशासनाचा प्रयत्न आहे.

फोनवरून नोंदवता येणार कामाची मागणी

हेल्पलाइनवर संपर्क साधल्यानंतर मजुरांना रोजगाराची मागणी नोंदवता येईल. याशिवाय, काम मिळाले नाही तर त्याबाबतची तक्रारही दाखल करता येणार आहे. त्यामुळे रोजगारासाठी केलेल्या मागणीची नोंद प्रशासनापर्यंत पोहोचवण्याचा मार्ग सुलभ होणार आहे. कामाची मागणी नोंदवण्यासाठी संबंधित हेल्पलाइन क्रमांकावर संपर्क साधावा, असे आवाहन करण्यात आले आहे.

नोंदणीसाठी कोणती माहिती द्यावी?

हेल्पलाइनवर फोन करताना मजुरांनी स्वतःचे नाव, जॉब कार्ड क्रमांक, तालुका, ग्रामपंचायत आणि गावाचे नाव सांगणे आवश्यक आहे. यासोबत गावापासून कामाचे ठिकाण किती अंतरावर आहे, याची माहितीही द्यावी लागणार आहे. या तपशिलांच्या आधारे रोजगाराची मागणी नोंदवली जाईल.

जिल्हा प्रशासनाकडून पुढील कार्यवाही

हेल्पलाइनवर नोंदवलेल्या रोजगाराच्या मागण्या संबंधित ग्रामरोजगार सेवक आणि कार्यक्रम अधिकाऱ्यांकडे पाठवल्या जाणार आहेत. त्यानंतर संबंधित ग्रामपंचायत व यंत्रणेमार्फत काम उपलब्ध करून देण्याची प्रक्रिया राबवली जाईल. रोजगाराची मागणी नोंदवल्यानंतर नियमानुसार १५ दिवसांच्या आत काम देण्याची तरतूद आहे.

मागणी करूनही निर्धारित कालावधीत रोजगार न मिळाल्यास संबंधित मजूर नियमांनुसार बेरोजगारी भत्त्यासाठी पात्र ठरू शकतात. त्यामुळे ग्रामीण भागातील मजुरांनी रोजगाराची गरज असल्यास हेल्पलाइनचा वापर करून मागणी नोंदवावी, असे आवाहन प्रशासनाकडून करण्यात आले आहे.