Balwant Wankhade : ...तर बळवंत वानखडे खासदारकीचा राजीनामा देणार; नवनीत राणांचं चॅलेंज स्वीकारलं

Amravati News: महाराष्ट्रातील विधानसभा निवडणुकीचा निकाल लागताच देशभरात ईव्हीएमविरोधात विरोधकांकडून आवाज उठवला जाऊ लागला आहे. त्यावरून सत्ताधारी भाजप नेत्यांकडून महाविकास आघाडीच्या आमदार-खासदारांना राजीनामे देण्याचे आव्हान दिले जात आहे. माजी खासदार नवनीत राणा यांनीही काँग्रेसचे खासदार बळवंत वानखडे यांना चॅलेंज दिले होते. हे चॅलेंज वानखडे यांनी स्वीकारले आहे.

ईव्हीएमवर शंका असेल तर वानखडे यांनी खासदारकीचा राजीनामा द्यावा, असे आव्हान राणांनी दिले होते. अमरावतीचे खासदार वानखडे यांनी हे आव्हान स्वीकारले आहे. तसेच त्यांनी राणांनाही प्रतिआव्हान दिले आहे. भाजपच्या विश्व नेत्या, राष्ट्रीय नेत्या नवनीत राणा असा उल्लेख करत वानखडे यांनी त्यांना टोलाही लगावला आहे.

वानखडे यांनी म्हटले आहे की, नवनीत राणा यांनी दिलेल्या आव्हानाप्रमाणे मी राजीनामा द्यायला तयार आहे. पण त्याआधी त्यांनी निवडणूक आयोगाकडून लेखी पत्र द्यावं. येणारी लोकसभेची पोटनिवडणूक बॅलेटपेपरवर होईल, असा उल्लेख त्या पत्रात असावा. त्यानंतर मी कधीही राजीनमा द्यायला तयार आहे, असे वानखडे यांनी म्हटले आहे.

दरम्यान, नवनीत राणा यांनी महाविकास आघाडीच्या नेत्यांवर टीका करताना म्हटले होते की, लोकसभा निवडणुकीच्या निकालात सर्वकाही ठीक होते. त्यावेळी लोकशाही जिवंत होती. विधानसभा निवडणुकीचा निकाल विरोधात आल्याने लोकशाही धोक्यात आली आहे. बॅलेट पेपरवर निवडणूक घ्यायची असेल तर वानखडे यांनी खासदारकीचा राजीनामा द्यावा, रवी राणाही आमदारकीचा राजीनामा देतील.

मारकडवाडी बनले ईव्हीएमविरोधातील केंद्र

सोलापूर जिल्ह्यातील मारकडवाडी गाव देशातील ईव्हीएमविरोधाचे केंद्र बनले आहे. विधानसभेच्या निकालानंतर या गावातील नागरिकांनी बॅलेट पेपरवर मतदान करण्याचा निर्णय घेतला होता. पण प्रशासनाच्या विरोधामुळे ही प्रक्रिया झाली नाही. मात्र, त्यानंतर या गावाने देशपातळीवर लक्ष वेधले आहे. राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांनी गावाला भेट दिली. काँग्रेस नेते राहुल गांधीही या गावात येणार असल्याची चर्चा आहे.