Beed News : बीडच्या मुलाचा पुण्यात हादरवणारा कांड; एअर फोर्सची वर्दी घालण्याची तयारी सुरु असतानाच झाला पर्दाफाश

Pune Crime News : एअर फोर्समध्ये जवान असल्याचे सांगत वर्दी शिवण्यासाठी टेलरकडे गेलेल्या एका तरुणाचा बनाव पुण्यात उघडकीस आला आहे. टेलरच्या सतर्कतेमुळे बोगस एअर फोर्स जवानाचा पर्दाफाश झाला. धक्कादायक म्हणजे, या तरुणाने २०२२ मध्ये रेल्वे अपघातात मृत्यू झालेल्या एअर फोर्स जवानाचे ओळखपत्र वापरल्याचे पोलिसांच्या चौकशीत समोर आले आहे.

शुभम विलास अंबुरे (वय २६) असे अटक करण्यात आलेल्या आरोपीचे नाव आहे. तो मूळचा बीड जिल्ह्यातील असून पुण्यात शिक्रापूर तालुक्यातील एका सलूनमध्ये काम करत असल्याची माहिती पोलिसांनी दिली.

पोलिसांनी दिलेल्या माहितीनुसार, शुभम अंबुरे लोहगाव परिसरातील गुरुद्वारा कॉलनी येथील बालाजी टेलर या दुकानात गेला होता. आपण भारतीय हवाई दलात जवान असल्याचे सांगत त्याने एअर फोर्सचा गणवेश शिवून देण्यास टेलरला सांगितले.

टेलरने त्याच्याकडे ओळखपत्राची मागणी केली. त्यानंतर अंबुरेने खिशातून एअर फोर्सचे आयकार्ड काढून दाखवले. मात्र, एअर फोर्सच्या जवानांची ओळखपत्रे नियमित पाहत असल्याने टेलरला त्या कार्डबाबत संशय आला. त्याने वेळ न दवडता लोहगाव पोलिसांना याची माहिती दिली.

माहिती मिळताच लोहगाव पोलिसांनी घटनास्थळी धाव घेत अंबुरेला ताब्यात घेतले. त्यानंतर लोहगाव येथील एअर फोर्स कार्यालयातील वरिष्ठ अधिकाऱ्यांनाही याबाबत माहिती देण्यात आली. पोलीस आणि हवाई दलाच्या अधिकाऱ्यांनी त्याची कसून चौकशी सुरू केली.

गावाकडे जवान असल्याचा केला होता बनाव

चौकशीदरम्यान अंबुरेने आपण एअर फोर्समध्ये कार्यरत नसल्याची कबुली दिली. गावाकडे आपण जवान असल्याचे सांगितले होते. हा बनाव पुढे नेण्यासाठी त्याने हवाई दलाच्या गणवेशाचीही तयारी सुरू केली होती. त्यासाठीच तो टेलरकडे वर्दी शिवून घेण्यासाठी पोहोचला. पण टेलरच्या सतर्कतेमुळे हा प्रकार वेळीच उघडकीस आला.

न्यायालयाने आरोपी शुभम अंबुरे याला सोमवारपर्यंत पोलीस कोठडी सुनावली आहे. या प्रकरणात त्याने मृत जवानाचे ओळखपत्र नेमके कसे मिळवले, त्याचा यापूर्वी आणखी कुठे, कसा वापर केलाय का? आणि या बनावामागे अन्य कोणी सहभागी आहे का, याचा लोहगाव पोलीस अधिक तपास करत आहेत.