राज्यात पुन्हा एकदा निवडणुकीचे वातावरण रंगू लागले आहे. डिसेंबरच्या पहिल्या आठवड्यात होणाऱ्या स्थानिक स्वराज्य संस्थांच्या निवडणुकीसाठी सर्वत्र जोरदार तयारी सुरू आहे. येत्या 2 आणि 3 डिसेंबर 2025 रोजी नगरपरिषद व नगरपंचायतींची सार्वत्रिक निवडणूक होत असून, मतदान सुरळीत आणि निर्विघ्न पार पडावे यासाठी महत्त्वाचा निर्णय घेण्यात आला आहे. जिल्हाधिकारी आणि जिल्हा निवडणूक अधिकारी जितेंद्र डुडी यांनी 2 डिसेंबर रोजी सार्वजनिक सुट्टी जाहीर करण्याची माहिती दिली आहे.
ही सुट्टी विशेषतः त्या भागांमध्ये लागू राहणार आहे, ज्या मतदारसंघात निवडणुका होत आहेत. पुणे जिल्ह्यातील आळंदी, बारामती, भोर, चाकण, दौंड, फुरसुंगी–उरळी देवाची, इंदापूर, जेजुरी, जुन्नर, लोणावळा, माळेगाव बु., मंचर, राजगुरुनगर, सासवड, शिरूर, तळेगाव दाभाडे आणि वडगाव या नगरपरिषद व नगरपंचायत क्षेत्रांमध्ये 2 डिसेंबरला सरकारी सुट्टी लागू राहील.
फक्त मतदान क्षेत्रातील सरकारी कार्यालयेच नव्हे तर केंद्र शासनाची कार्यालये, निमशासकीय विभाग, सार्वजनिक उपक्रम, तसेच बँकांनाही ही सुट्टी लागू राहणार आहे. त्यामुळे नागरिकांनी 2 डिसेंबरला बँकिंग किंवा सरकारी कामकाजाचे नियोजन करताना काळजी घ्यावी. त्या दिवशी सर्व संबंधित कार्यालये पूर्णपणे बंद असतील.
महत्त्वाचे म्हणजे, त्या-त्या मतदारसंघात कामानिमित्त बाहेर राहणाऱ्या पात्र मतदारांसाठीही ही सुट्टी लागू होईल, जेणेकरून त्यांना मतदानाचा हक्क बजावता येईल. जिल्हाधिकारी डुडी यांनी नागरिकांना आवाहन करताना सांगितले की, "मतदान हा प्रत्येक नागरिकाचा हक्क आणि कर्तव्य आहे. म्हणून सर्व पात्र मतदारांनी 2 डिसेंबर रोजी मतदान करून लोकशाही प्रक्रियेत सहभागी व्हावे.”
दरम्यान, निवडणूक प्रचाराबाबतही महत्त्वाचा बदल करण्यात आला आहे. राज्य निवडणूक आयोगाने प्रचाराची मुदत वाढवली असून आता उमेदवारांना 1 डिसेंबरच्या रात्री 10 वाजेपर्यंत प्रचार करता येणार आहे. अपात्र उमेदवार किंवा ज्यांना उशिरा निवडणूक चिन्ह मिळाले आहे, त्यांना यामुळे दिलासा मिळणार आहे.
स्थानिक निवडणुका जवळ येत असताना मतदारांमध्ये उत्सुकता वाढत असून, प्रशासनही निवडणूक पारदर्शक आणि शांततेत पार पडावी यासाठी सज्ज झाले आहे. आता सर्वांची नजर 2 डिसेंबरच्या मतदानावर आणि नव्या स्थानिक सत्तेच्या घडामोडींवर लागली आहे
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.