Kalyan Dombivli politics: कल्याण-डोंबिवलीत रवींद्र चव्हाणांचा जलवा : शिवसेनेला मागे टाकून भाजपचे 15 उमेदवार बिनविरोध

Mumbai News : राज्यभरातील 29 महापालिका निवडणुकीसाठी 15 जानेवारीला मतदान होणार आहे. या निवडणुकीसाठी सर्वच पक्ष जोरदार तयारीला लागले आहेत. त्यातच उमेदवारी अर्ज मागे घेण्याचा शुक्रवारी शेवटचा दिवस होता. त्यामुळे सर्वच पक्षांचे टेन्शन वाढले होते. मात्र कल्याण-डोंबिवली महानगरपालिका निवडणुकीत भाजपने जोरदार आघाडी घेतली आहे. महापालिकेत 15 नगरसवेक बिनविरोध निवडून आणत भाजपचे प्रदेशाध्यक्ष रवींद्र चव्हाण यांनी त्यांच्या बालेकिल्ल्यात जलवा दाखवला. चव्हाण यांनी एकनाथ शिंदे यांच्या शिवसेनेला मागे टाकून भाजपचे 15 उमेदवार बिनविरोध निवडून आणले.

कल्याण-डोंबिवली महापालिकातील भाजपचे (BJP) 15 उमेदवार बिनविरोध निवडून आले. तर दुसरीकडे एकनाथ शिंदे यांच्या शिवसेनेचे चार उमेदवार बिनविरोध विजयी झाले. 30 डिसेंबरला उमेदवारी अर्ज दाखल केल्यानंतर 31 डिसेंबरपासून उमेदवारी अर्ज मागे घेतले जात होते. गुरुवारपर्यंत नऊ उमेदवार बिनविरोध निवडून आले. त्यामध्ये भाजपचे पाच तर शिवसेनेचे चार उमेदवार विजयी झाले.

महापालिका निवडणुकीसाठी उमेदवारी अर्ज मागे घेण्याचा शुक्रवारी शेवटचा दिवस होता. या शेवटच्या दिवशी जवळपास भाजपचे दहा उमेदवार बिनविरोध निवडून आले. त्यांच्या विरोधातील महाविकास आघाडीमधील उद्धव ठाकरे यांच्या शिवसेना व मनसेच्या उमेदवारांनी निवडणुकीच्या रिंगणातून माघार घेतली. त्यामुळे मोठ्या संख्येने भाजपचे उमेदवार बिनविरोध विजयी झाले. भाजपचे प्रदेशाध्यक्ष रवींद्र चव्हाण यांच्या होमपीचवर त्यांनी ही जादुई कामगिरी करीत विरोधकांना आस्मान दाखवले आहे.

भाजपचे प्रदेशाध्यक्ष व आमदार रविंद्र चव्हाण यांच्या विशेष प्रयत्नाने १५ उमेदवार बिनविरोध विजयी झाले आहेत. त्यांची नावे व कंसात प्रभाग क्रमांक आहे. रंजना पेणकर (२६ ब),आसावरी नवरे (२६ क), मंदा पाटील (२७ अ), ज्योती पाटील ( २४ ब), रेखा चौधरी (१८ अ), मुकंद तथा विशू पेडणेकर ( २६ अ), महेश पाटील (२७ ड), साई शेलार ( १९ क), दिपेश म्हात्रे (२३ अ), जयेश म्हात्रे (२३ ड), हर्षदा भोईर (२३ क), डॉ. सुनिता पाटील (१९ ब), पूजा म्हात्रे (१९ अ), रविना माळी (३० अ), मंदार हळबे (२६ ड). तर एकनाथ शिंदे यांच्या शिवसेनेचे रमेश म्हात्रे, विश्वनाथ राणे, वृषाली जोशी, हर्षल मोरे हे बिनविरोध निवडून आलेले उमेदवार आहेत.

कल्याण-डोंबिवलीत भाजपने विजयी ‘घोडदौड’ सुरूच ठेवली आहे. सलग पॅनलमध्ये बिनविरोध विजय मिळवत भाजपने संघटनात्मक ताकद, उमेदवार निवड आणि राजकीय व्यवस्थापन या तिन्ही आघाड्यांवर आपले वर्चस्व अधोरेखित केले आहे. त्यामुळे या निवडणुकीकडे सर्वांचे लक्ष लागले आहे.