Kolhapur Mahapalika: महापालिकेत गटनेता ठरला! भाजप, शिवसेना, राष्ट्रवादीसह काँग्रेसने दिला अनुभवी चेहरा

Kolhapur News: कोल्हापूर महानगरपालिकेची निवडणूक पार पडल्यानंतर सभागृहातील गटनेता ठरवण्यासाठी सर्वच राजकीय पक्षांसह नेत्यांची कसरत सुरु होती. महापालिकेत महायुती सत्ता स्थापन करत असताना विरोधकांकडे अनुभवी फौज असल्याचे लक्षात घेत भाजप, शिवसेना आणि राष्ट्रवादी काँग्रेसकडे अनुभवी चेहरा शोधण्यासाठी धडपड सुरू होते.

अखेर त्यावर शिक्कामोर्तब झाले आहे. भाजप शिवसेना आणि राष्ट्रवादी काँग्रेसकडून अनुभवही चेहऱ्यांना पसंती दिली आहे. तर दुसरीकडे विरोधात असणाऱ्या काँग्रेस पक्षाने देखील दुसऱ्यांदा निवडून आलेल्या चेहऱ्याला म्हणजेच अनुभवी नगरसेवकाच्या गळ्यात गटनेचा पदाची माळ घातली आहे.

महापालिका निवडणुकीचा निकाल लागल्यानंतर भाजपसह अन्य सर्वच पक्षांमध्ये गटनेते पदावर कोणाची वर्णी लावायची? याबाबत अनेक खलबते सुरू होती. पक्षाकडे अनुभवी आणि सभागृहातील अभ्यासू माहितीपूर्ण असणारा चेहरा या सभागृहासाठी आवश्यक असल्याने सर्वच राजकीय पक्षांनी अनुभवी लोकांना पसंती देण्यावर एकमत दर्शवले होते.

त्यासंदर्भात भाजप शिवसेना राष्ट्रवादीसह काँग्रेसने आपल्या व्यक्तिगत पातळीवर बैठक घेऊन या विषयावर चर्चा केली होती. शिवसेना राष्ट्रवादी काँग्रेस आणि काँग्रेसमध्ये एकमुखी निर्णय घेण्यात आला तर भाजपमध्ये बंद पाकिटात चौघा अनुभवी नगरसेवकांची नावे वरिष्ठाकडे पाठवली होती.

कोल्हापूर महानगरपालिकेमध्ये भाजपकडून माजी महापौर नगरसेवक मुरलीधर जाधव यांची गटनेता पदावर निवड करण्यात आली. गेल्या 20 ते 30 वर्षांपासून ते कोल्हापूर महानगरपालिकेच्या सभागृहात आहेत. तर शिवसेनेकडून माजी स्थायी समिती सभापती आणि नगरसेवक शारंगधर देशमुख यांची निवड करण्यात आली.

गेल्या वीस वर्षापासून ते महापालिकेच्या सभागृहात आहेत. तर राष्ट्रवादी काँग्रेसकडून माजी स्थायी समिती सभापती आणि नगरसेवक आदिल फरास यांची निवड करण्यात आली आहे. तर काँग्रेसकडून आज सर्वच नगरसेवकांची विभागीय आयुक्तांकडे नोंद करण्यात येत आहे. यावेळी दोन वेळा सभागृहात निवडून आलेले माजी नगरसेवक इंद्रजीत बोंद्रे यांची काँग्रेसच्या गटनेते पदावर यांची निवड होण्याची शक्यता आहे.

29 जानेवारीला भाजप, 28 ला शिवसेनेची नोंदणी

कोल्हापूर महानगरपालिकेच्या निवडणुकीत निवडून आलेल्या नगरसेवकांची नोंदणी ही विभागीय आयुक्त पुणे येथे होत आहे. त्या पार्श्वभूमीवर काँग्रेसकडून निवडून आलेल्या नगरसेवकांची नोंदणी आज होत आहे. 28 जानेवारी रोजी शिवसेनेचे सर्व नगरसेवक तर 29 जानेवारीला भाजपच्या विजयी नगरसेवकांना वेळ देण्यात आली आहे.