Disha Salian Case : भाजप प्रदेशाध्यक्षांच्या तंबीनंतर नितेश राणेंचा यू-टर्न? दिशा सालियन प्रकरणावर सावध भूमिका घेत केलेली पोस्ट चर्चेत

Disha Salian Death Case News : महाराष्ट्रभरात चर्चेत असलेल्या दिशा सालियन मृत्यू प्रकरणावरून राजकीय वातावरण तापले आहे. शनिवारी (ता.19) मातोश्री बंगल्याबाहेर हायव्होल्टेज घडामोडी घडल्या. दिवंगत दिशा सालियन यांचे वडील सतीश सालियन यांनी आमदार आदित्य ठाकरे यांना 500 कोटी रुपयांच्या नुकसानभरपाईची मागणी करणारी कायदेशीर नोटीस बजावली.

त्याचवेळी या प्रकरणात सातत्याने आदित्य ठाकरे यांच्यावर आरोप करणाऱ्या मंत्री नितेश राणे यांनी अत्यंत सावध भूमिका घेत केलेली पोस्ट चर्चेचा विषय ठरली आहे. या पोस्टमध्ये राणे यांनी कोणाचेही नाव घेतलेले नाही. ते म्हणाले, "माझ्या प्रसारमाध्यमांमधील मित्रांनो... दिशा सालियन प्रकरणात कायद्याला त्याची प्रक्रिया पूर्ण करू द्यावी, या विषयावर रोज भाष्य करणे माझ्यासाठी योग्य नाही, धन्यवाद, असे त्यांनी म्हटले आहे.

सातत्याने आक्रमकपणे आदित्य ठाकरे यांच्यावर आरोप करणाऱ्या मंत्री नितेश राणे यांनी एवढी सावध भूमिका कशी काय घेतली? यावर आता चर्चा सुरु झाली आहे. यामागे भाजप प्रदेशाध्यक्ष रविंद्र चव्हाण यांनी "पुरावे असल्याशिवाय बोलू नका" अशी तंबी राणे यांना दिल्याचे बोलले जात आहे.

भाजपचे प्रदेशाध्यक्ष रविंद्र चव्हाण यांनी दिशा सालियन प्रकरणावर बोलताना राणे यांचे कान टोचले होते. "प्रत्येक कार्यकर्त्यानं, पदाधिकाऱ्यानं सगळ्यांनीच आपण काय बोलावं आणि काय सांगावं? याकडं लक्ष द्यावं. पुराव्याअभावी कधी बोलू नये. या सगळ्यामध्ये एखादी गोष्ट जोपर्यंत आपल्याला माहिती नाही किंवा त्याचे पुरावे आपल्याकडं नाही त्यावर आपण बोलता कामा नये", असे म्हणत तंबी दिली होती.

नितेश राणे यांनी २०२० मध्ये दिशा सालियानच्या मृत्यू झाल्यापासून आत्तापर्यंत सातत्यानं आदित्य ठाकरेंचं यामागे कनेक्शन असल्याचा आरोप केला आहे. याविरोधात नुकतेच आदित्य ठाकरे यांनी ट्विट करुन आपल्यावरील सर्व आरोप फेटाळून लावताना आपण दिशा सालियानला ओळखतही नाही तिच्याशी आपली कधी भेटही झाली नव्हती असा दावा केला आहे. तर उद्धव ठाकरे यांनी यामध्ये जर कोणी राजकीय फायद्यासाठी मुलगा आदित्य ठाकरे यांचं नाव घेत असेल तर कायदेशीर कारवाईला सामोरं जावं लागेल असा इशाराही दिला आहे.