मी शिवसेनेत यावे म्हणून अनेक प्रयत्न केले पण...! कारवाईनंतर खेडेकरांनी दिलं आव्हान

रत्नागिरी : महाराष्ट्र नवनिर्माण सेनेचे (MNS) कोकणातील नेते वैभव खेडेकर (Vaibhav Khedekar) यांच्यावर सहा वर्षांच्या अपात्रतेची कारवाई करण्यात आली आहे. त्यामुळे त्यांना पुढील सहा वर्ष निवडणूक लढवता येणार नाही. नगरविकास मंत्री एकनाथ शिंदे (Eknath Shinde) यांनी बुधवारी (ता. 7) कारवाईचा आदेश काढला आहे. या आदेशानंतर खेडेकर यांनी शिवसेनेवर गंभीर आरोप केले असून ही लढाई लढत राहणार असल्याचे आव्हान दिले आहे.

खेडेकर यांच्यावर झालेल्या कारवाईमुळे कोकणात पुन्हा एकदा शिवसेना (Shiv Sena) विरूध्द मनसे असा संघर्ष पेटण्याची शक्यता आहे. पदाचा दुरूपयोग केल्याचा ठपका ठेवत खेडेकर यांच्यावर ही कारवाई करण्यात आल्याचे आदेशात नमूद करण्यात आले आहे. रत्नागिरी जिल्ह्यातील खेड नगरपरिषदेचे ते नगराध्यक्ष होते. कोकणातील (kokan) शिवसेनेचे नेते रामदास कदम यांच्याशी सुरू असलेल्या वादामुळे ही कारवाई झाल्याची चर्चा राजकीय वर्तुळात रंगली आहे. खेडेकर यांनी कदमांवर काही दिवसांपूर्वीच गंभीर आरोप केले होते.

कारवाईचा आदेश आल्यानंतर खेडेकर यांनी शिवसेनेवर गंभीर आरोप केले आहेत. महाराष्ट्राच्या राजकारणाचा खालावलेला स्तर मला या निर्णयातून पाहायला मिळत आहे. मी महाराष्ट्राबाहेर आहे. मला सहा वर्षांसाठी अपात्र केल्याचा आदेश मला वॉट्सअॅपवर मिळाला. मला हा निर्णय अपेक्षितच होता. मी शिवसेनेत यावे, यासाठी अनेक प्रयत्न केले गेले. मी शिवसेनेत जात नाही म्हटल्यावर अशापध्दतीचा राजकीय निर्णय घेतला गेला, असं खेडेकर म्हणाले.

मला समाधान आहे की, मी नगराध्यक्ष पदाची कारकीर्द पूर्ण केली आहे. मी या निर्णयाविरोधात उच्च न्यायालयात आव्हान देणार आहे. त्यात मला यश मिळेल, असा विश्वास आहे. न्यायालयाने या प्रकरणात आधीच स्थगिती दिली आहे. पुढेही ही लढाई लढत राहीन आणि पुन्हा नगराध्यक्ष पदासाठी उभा असेन, असं सांगत खेडेकर यांनी शिवसेनेला एकप्रकारे आव्हान दिलं आहे.

दरम्यान, महाराष्ट्र नगरपरिषदा, नगरपंचायती व औद्योगिक नागरी अधिनियम, 1965 चे कलम 55 ब मधील तरतुदीनुसार या आदेशाच्या दिनांकापासून सहा वर्षांचा कालावधी संपेपर्यंत खेडेकर यांना नगरपरिषद सदस्य म्हणून निवडले जाण्यास अपात्र ठरवण्यात आले आहे. गजनेते प्रज्योत तोडकरी, उपनगराध्यक्ष सुनील दरेकर व अन्य सात नगरसेवकांनी खेडेकर यांची तक्रार करून कारवाईची मागणी केली होती. खेडेकर नगराध्यक्ष असताना ही तक्रार करण्यात आली होती.

या तक्रारीवर नगरविकास मंत्र्यांसमोर 11 नोव्हेंबर 2021 रोजी व्हिड़ीओ कॉन्फरन्सिंगद्वारे अंतिम सुनावणी झाली होती. त्यानंतर आता कारवाईचा आदेश काढण्यात आला. खेडेकर यांना त्यांचे म्हणणे मांडण्याची संधी देण्यात आली आहे. त्यांनी मांडलेले मुद्दे, तरतुदी व आपल्यासमोर आलेली कागदपत्रे पाहिली असता खेडेकर यांच्यावरली सर्व दोषारोप सिध्द होतात, असे आदेशात नमूद करण्यात आलं आहे.

खेडेकर यांच्याकडून जाणीवपूर्वक नियमांचे उल्लंघन झाले आहे. हे उल्लंघन गैरवर्तणूक तसेच नियमांची हयगय करणे या सदरात मोडत असल्याचेही आदेशात स्पष्ट करण्यात आले आहे. खेड नगरपरिषदेचा कार्यकाळ दि. 28 डिसेंबर 2021 रोजी संपुष्टात आला असून प्रशासकपती उपविभागीय अधिकाऱ्यांची नियुक्ती करण्यात आली आहे. त्यामुळे खेडेकर हे सध्या नगराध्यक्षपदी कार्यरत नाही. त्यामुळे 1965 च्या अधिनियमातील अधिकारांचा वापर करून हे आदेश एकनाथ शिंदे यांनी दिले आहेत.

खेडेकरांवर कोणते आरोप आहेत?

- देयके प्रदान करताना नमुना क्र. 64 वर एकट्याने स्वाक्षरी केली

- - लेखाधिकारी यांनी तपासणी केला नसतानाही रकमा प्रदान केल्या

- - स्वत:च्या खाजगी वाहनात नगरपरिषदेच्या खर्चाने इंधन भरणे

- - बिगरशेती परवानगी न घेता बांधकाम करणे